Туркманистон Украинадаги болаларга дори-дармон, озиқ-овқат ва зарур товарларни инсонпарварлик ёрдами сифатида юборади, деб хабар бермоқда “Нейтралний Туркманистан” газетаси.
Тегишли буйруқни Туркманистон президенти Сердар Бердимуҳамедов имзолаган. Ҳужжатда айтилишича, фармон “туркман халқининг яхши қўшничилик ва инсонпарварликнинг азалий анъаналарига” мувофиқ имзоланган.
Буйруқ Туркманистон тиббиёт ва тўқимачилик саноати давлат бошқармаларига, шунингдек, Саноатчилар ва тадбиркорлар уюшмасига йўлланган.
Туркманистон мамлакат конституциясига мувофиқ 1995 йилдан бери ижобий бетарафлик сиёсатини олиб бормоқда. Шу муносабат билан расмий Ашхобод дунёда, жумладан, Россия 2022 йил февралида “махсус ҳарбий операция” бошлаган Украинадаги драматик воқеаларга изоҳ бермаяпти.
Октябрь ойида Туркманистон ва Украина дипломатик муносабатлари ўрнатилганининг 30 йиллигини нишонлади. Бердимуҳамедов шу муносабат билан Украина президенти Владимир Зеленскийга мактуб йўллади.
“Давлатларимиз ўртасидаги муносабатлар ўзаро ҳурмат, тенг ҳуқуқлилик ва ўзаро ишончга асосланган. Туркманистон икки томонлама алоқаларни кенгайтиришдан манфаатдор”, — дея таъкидлаган Туркманистон президенти ўз мактубида.
Эзиз Бояров, Ашхобод
Изоҳ (0)