Хитойда бир кунда пандемия бошидан буён рекорд даражада кўп одам коронавирусга чалинди

Хитойда 24 ноябрь куни 32 943 киши коронавирусга чалинди, деб хабар бермоқда Миллий соғлиқни сақлаш комиссияси.

Ҳукумат маълумотларига кўра, касаллик аломатлари 3103 кишида аниқланган, 29 840 киши уни симптомларсиз ўтказмоқда. Энг кўп Хитой жануби-шарқидаги Гуандун провинцияси жабр кўрган — у ерда 8499 та янги ҳолат қайд этилган.

Хитой ҳукумати мамлакатда аниқланган касалланиш ҳолатларининг барчасини симптомлар аниқ акс этадиган ва симптомсиз ўтадиган ҳолатларга ажратади. Иккала ҳолатда ҳам ҳукумат беморнинг хориждан келгани ёки мамлакат ичида касалланганини ҳисобга олади.

Юқорида тилга олинган ҳолатларнинг барчаси қитъа Хитойига тегишли. Гонконг, Макао ва Хитой ўз ҳудуди деб ҳисоблайдиган Тайван учун статистика алоҳида олиб борилади.

23 ноябрь куни эса мамлакатда 31 656 киши касалликка чалинган. South China Morning Post газетаси ёзишича, шу куни Хитойда касалланишлар сони бўйича рекорд ўрнатилган.

Пандемия бошидан буён аниқ акс этган симптомлар Хитойнинг 300,6 минг нафар фуқаросида қайд этилган, шуларнинг 5,2 минги вафот этган. Комиссия аниқлик киритишича, ўтган бир кеча-кундуз ичида беморлар орасида ўлим ҳолатлари бўлмаган.

Хитойда инфекциянинг навбатдаги тўлқини фонида чекловлар киритила бошлади. Чунончи, баъзи провинцияларда, шу жумладан, Гуандунда мактаблар ва университетлар масофадан ишлаш режимига ўтказилди, болалар боғчалари ишлашдан тўхтади. Пекин ҳукумати аҳолига манфий натижали ПЗР-тестсиз жамоат жойларига ташриф буюришни тақиқлади. Тақиқ транспорт, савдо марказлари, супермаркетлар, меҳмонхоналар ва маъмурий биноларга тааллуқли. Жамоат жойига боришдан 48 соат аввал топширилган ПЗР-тест ҳақиқий деб ҳисобланилади.