АҚШ ва Европа давлатларининг ҳарбий ёрдами туфайли Украина Россия босқинидан кейин 2022 йилда дунёдаги учинчи йирик қурол импортчисига айланди. Бу ҳақда Стокгольм халқаро тинчлик муаммоларини ўрганиш институти (SIPRI) тадқиқотида айтилади.
1991 йилдан 2021 йил охиригача Украина асосий турдаги қуролларни оз миқдорда импорт қилган.
“АҚШ ва кўплаб Европа давлатларининг ҳарбий ёрдами туфайли Украина 2022 йилда Қатар ва Ҳиндистондан кейин энг йирик қурол-яроғ импорт қилувчи учинчи давлат бўлди”, — дейилади тадқиқотда.
2018 йилдан 2022 йилгача қурол экспорт қилувчи беш етакчи давлат АҚШ, Россия, Франция, Хитой ва Германия бўлди, деб таъкидлайди SIPRI.
“НАТО давлатлари Украинадаги урушнинг янада авж олиши ҳақидаги хавотирлар туфайли 2022 йилда Украинанинг жанговар самолётлар ва узоқ масофага учувчи ракеталарни етказиб бериш бўйича сўровларини рад этди. Шу билан бирга, улар бундай қуролларни можароларда иштирок этаётган бошқа давлатларга, хусусан, Яқин Шарқ ва Жанубий Осиёга етказиб беришди”, — деди SIPRI қурол узатиш дастурининг катта илмий ходими Питер Д.Весеман.
8 март куни Стокгольмда Европа Иттифоқи мудофаа вазирлари артиллерия снарядларини етказиб беришни тезлаштиришга ва Украинага ёрдам учун қўшимча ўқ-дорилар сотиб олишга келишиб олди, аммо бу режаларни қандай амалга ошириш ҳозирча ҳал қилинмаган.
Стокгольмда бўлган Украина мудофаа вазири Алексий Резников вазирларни Эстония режасини қўллаб-қувватлашга чақирган — режага кўра, Европа Иттифоқи давлатлари жорий йилда 4 миллиард евро қийматидаги 1 миллионта 155 миллиметрлик снаряд сотиб олиш учун кучларини бирлаштириши керак бўлади.
Изоҳ (0)