Хитой ҳар доим Россия—Украина можаросининг барча томонлари билан алоқаларни сақлаб келган, деди Хитой Ташқи ишлар вазирлиги матбуот котиби Мао Нин брифингда. У Хитой раҳбари Си Цзиньпин билан учрашишга умид билдирган Украина президенти Владимир Зеленскийнинг сўзларига шундай муносабат билдирди.
“Асосийси тинчликка чақириш, мулоқот ва можарони сиёсий ҳал этишга кўмаклашиш. Биз зиддият иштирокчилари, жумладан, Украина билан ҳамиша алоқада бўлиб келганмиз”, — деди дипломат. У Пекиннинг Россия “махсус ҳарбий операцияси” бўйича позициясини “мўтадил ва жуда аниқ” деб атади.
Украинада уруш бошланганининг бир йиллиги муносабати билан Пекин 12 банддан иборат “тинчлик режаси”ни эълон қилганди. Унда Хитой томони, хусусан, барча давлатларнинг суверенитети ва ҳудудий яхлитлигини ҳурмат қилишни, совуқ уруш менталитетидан воз кечишни, ҳарбий ҳаракатларни тўхтатишни, музокараларни қайта бошлашни ва бир томонлама санкцияларни бекор қилишни таклиф қилган.
Зеленский Пекиннинг таклифларини тинчлик режаси сифатида кўрмади. “Менимча, Хитой бу борада ўз фикрларини билдирганга ўхшайди”, — деди Украина раҳбари. “Хитой можаро ҳақида гапира бошлагани яхши, бошқа савол эса — бу сўзлар ортида нима бор?”. Зеленскийнинг таъкидлашича, агар Хитой режасида Россия қўшинларини Украина ҳудудидан олиб чиқиб кетиш ҳақида банд бўлмаса, бундай лойиҳани амалга ошириш нореал.
У Хитой раиси билан учрашса маъқул бўлишини, бу учрашув икки мамлакат ва дунёдаги хавфсизликка фойда келтиришини айтди.
Изоҳ (0)