AQSH va Yevropa davlatlarining harbiy yordami tufayli Ukraina Rossiya bosqinidan keyin 2022-yilda dunyodagi uchinchi yirik qurol importchisiga aylandi. Bu haqda Stokgolm xalqaro tinchlik muammolarini o‘rganish instituti (SIPRI) tadqiqotida aytiladi.
1991-yildan 2021-yil oxirigacha Ukraina asosiy turdagi qurollarni oz miqdorda import qilgan.
“AQSH va ko‘plab Yevropa davlatlarining harbiy yordami tufayli Ukraina 2022-yilda Qatar va Hindistondan keyin eng yirik qurol-yarog‘ import qiluvchi uchinchi davlat bo‘ldi”, — deyiladi tadqiqotda.
2018-yildan 2022-yilgacha qurol eksport qiluvchi besh yetakchi davlat AQSH, Rossiya, Fransiya, Xitoy va Germaniya bo‘ldi, deb ta’kidlaydi SIPRI.
“NATO davlatlari Ukrainadagi urushning yanada avj olishi haqidagi xavotirlar tufayli 2022-yilda Ukrainaning jangovar samolyotlar va uzoq masofaga uchuvchi raketalarni yetkazib berish bo‘yicha so‘rovlarini rad etdi. Shu bilan birga, ular bunday qurollarni mojarolarda ishtirok etayotgan boshqa davlatlarga, xususan, Yaqin Sharq va Janubiy Osiyoga yetkazib berishdi”, — dedi SIPRI qurol uzatish dasturining katta ilmiy xodimi Piter D.Veseman.
8-mart kuni Stokgolmda Yevropa Ittifoqi mudofaa vazirlari artilleriya snaryadlarini yetkazib berishni tezlashtirishga va Ukrainaga yordam uchun qo‘shimcha o‘q-dorilar sotib olishga kelishib oldi, ammo bu rejalarni qanday amalga oshirish hozircha hal qilinmagan.
Stokgolmda bo‘lgan Ukraina mudofaa vaziri Aleksiy Reznikov vazirlarni Estoniya rejasini qo‘llab-quvvatlashga chaqirgan — rejaga ko‘ra, Yevropa Ittifoqi davlatlari joriy yilda 4 milliard yevro qiymatidagi 1 millionta 155 millimetrlik snaryad sotib olish uchun kuchlarini birlashtirishi kerak bo‘ladi.
Izoh (0)