Жанубий Корея Шимолий Корея таҳдидларига қарши мудофаани кучайтириш учун ўз ядро қуролини ишлаб чиқиши керак. Сеул мэри О Се Хун шундай чақириқ билан чиқди, деб ёзмоқда South China Morning Post.
“Шимолий Корея тактик ядро қуролларини кичрайтириш ва енгиллаштиришда деярли муваффақиятга эришди ва камида ўнлаб жанговар каллакларни қўлга киритди. Биз шундай нуқтага келдикки, энди одамларни ядро қуролини яратишдан тийилиш ва ядросизланиш ғоясига содиқ қолишимиз кераклигига мантиқан ишонтириш қийин”, — деди сиёсатчи. Украинада уруш бошланганидан кейин Корея яриморолининг ядросизланиши “ўз жозибадорлигини йўқотган”ини таъкидлади.
Сеул мэри — республика президенти Юн Сук Ёлнинг консерватив “Халқ ҳокимияти партияси”нинг нуфузли аъзоси ҳисобланади. У Жанубий Кореянинг ядровий қурол дастурини фаол тарғиб қилувчи энг юқори мартабали амалдорлардан биридир. SCМP таъкидлашича, мэр 2027 йилги президентлик сайловида давлат раҳбари лавозимига даъвогарлик қилиши мумкин.
Шимолий Корея армиясидаги ютуқлар фонида Жанубий Кореянинг кўплаб юқори мартабали амалдорлари ядро қуролини ишлаб чиқиш ёки АҚШнинг 1990 йилда Кореядан олиб кетган Америка тактик ядро бомбалари ва ракеталарини қайта жойлаштириш масаласини кўтармоқда.
Эслатиб ўтамиз, аввалроқ Шимолий Корея сувости кемасидан иккита “стратегик қанотли ракета” учирганини ва улар Япон денгизидаги нишонга тегганини маълум қилди.
Изоҳ (0)