Janubiy Koreya Shimoliy Koreya tahdidlariga qarshi mudofaani kuchaytirish uchun o‘z yadro qurolini ishlab chiqishi kerak. Seul meri O Se Xun shunday chaqiriq bilan chiqdi, deb yozmoqda South China Morning Post.
“Shimoliy Koreya taktik yadro qurollarini kichraytirish va yengillashtirishda deyarli muvaffaqiyatga erishdi va kamida o‘nlab jangovar kallaklarni qo‘lga kiritdi. Biz shunday nuqtaga keldikki, endi odamlarni yadro qurolini yaratishdan tiyilish va yadrosizlanish g‘oyasiga sodiq qolishimiz kerakligiga mantiqan ishontirish qiyin”, — dedi siyosatchi. Ukrainada urush boshlanganidan keyin Koreya yarimorolining yadrosizlanishi “o‘z jozibadorligini yo‘qotgan”ini ta’kidladi.
Seul meri — respublika prezidenti Yun Suk Yolning konservativ “Xalq hokimiyati partiyasi”ning nufuzli a’zosi hisoblanadi. U Janubiy Koreyaning yadroviy qurol dasturini faol targ‘ib qiluvchi eng yuqori martabali amaldorlardan biridir. SCMP ta’kidlashicha, mer 2027-yilgi prezidentlik saylovida davlat rahbari lavozimiga da’vogarlik qilishi mumkin.
Shimoliy Koreya armiyasidagi yutuqlar fonida Janubiy Koreyaning ko‘plab yuqori martabali amaldorlari yadro qurolini ishlab chiqish yoki AQSHning 1990-yilda Koreyadan olib ketgan Amerika taktik yadro bombalari va raketalarini qayta joylashtirish masalasini ko‘tarmoqda.
Eslatib o‘tamiz, avvalroq Shimoliy Koreya suvosti kemasidan ikkita “strategik qanotli raketa” uchirganini va ular Yapon dengizidagi nishonga tegganini ma’lum qildi.
Izoh (0)