Шимолий Корея етакчиси Ким Чен Ин ҳарбийларга “ҳақиқий уруш” учун машғулотларни кучайтиришни буюрди. Бу ҳақда South China Morning Post хабар берди.
9 март куни Шимолий Корея ғарбий соҳиллар яқинидаги сувларга яқин масофали баллистик ракета учирди. Маҳаллий матбуот бир вақтнинг ўзида олтита ракета учирилганини маълум қилди. Охирги ракета АҚШ ва Жанубий Корея келаси ҳафта ўзларининг энг йирик қўшма ҳарбий — Freedom Shield машғулотларини ўтказишга тайёргарлик кўраётганида учирилди.
KCNA’нинг маълум қилишича, “зарба бериш миссиялари”га тайёрланган бўлинма “ниҳсондаги сувларга кучли ўқ узган” ва “ҳақиқий урушга қарши туриш” қобилиятини кўрсатган.
“Ким Чен Ин ҳужум бўлинмалари иккита стратегик вазифани бажаришда юқори маҳоратга эга бўлиши учун тайёргарликдан ўтиши кераклигини таъкидлади. Улардан бири урушни тўхтатиш, иккинчиси урушда ташаббусни қўлга киритиш, бунда ҳақиқий уруш учун турли хил машқларни доимий равишда кучайтириш”, — дейди маҳаллий KCNA нашри.
Шимолий Корея етакчисига бир қатор йирик ҳарбий тадбирларда унинг қизи ҳамроҳлик қилади. Улар охирги марта артиллерия машғулотларига раҳбарлик қилган. Ҳарбий қисм ва дивизия элементларини кўздан кечирган Ким Чен Ин Шимолий Корея раҳбари “урушга тайёргарликнинг ҳақиқий ҳолати ва аскарларнинг хизмат муддати билан батафсил танишган”.
Ким Чен Иннинг меросхўри — Чжу Э ҳақида нималар маълум?
2022 йил ноябрида Шимолий Корея етакчиси Ким Чен Ин қизи Чжу Эни илк бор кўрсатди. Бунгача КХДРнинг 38 ёшли етакчиси ҳеч бир фарзандини оммага намойиш қилмаган. Чжу Э мамлакатдаги энг йирик қитъалараро баллистик ракетани ишга тушириш жараёнида отаси ёнида бўлган.
Вашингтондаги Стимсон марказининг Шимолий Корея бўйича эксперти Майкл Мадденнинг фикрича, Ким қизини оммага олиб чиқиш орқали унинг ҳокимият давомчиси эканини кўрсатиши мумкин. Январь ойида Шимолий Корея етакчиси қизи билан қўшинлар ва қитъалараро баллистик ракетани текшириш давомида кўриниш берди. КХДР давлат ахборот агентлиги KCNA қизни Ким Чен Иннинг “энг севимли” ва “қимматли” фарзанди деб атаган.
Айрим таҳлилчиларнинг фикрича, Ким Чен Ин эрта босқичда ҳокимиятнинг эҳтимолий меросхўри номини айтиб, отаси йўл қўйган хатодан қочишга ҳаракат қилмоқда.
Изоҳ (0)