АҚШ разведкаси маълумотлари шуни кўрсатмоқдаки, Хитой раҳбари Си Цзиньпин ўз ҳарбийларига Тайванга бостириб киришга тайёрланиш ҳақида кўрсатма берган бўлса-да, Россиянинг Украинадаги тажрибасини ҳисобга олган ҳолда, Хитой етакчиси буни амалга ошириш мумкинлигига шубҳа қилмоқда. Бу ҳақда АҚШ Марказий разведка бошқармаси (МРБ) директори Уилям Бернс CBS телеканалига берган интервьюсида айтиб ўтди.
“Россия президенти Владимир Путиннинг Украинадаги тажрибасини Си Цзиньпинчалик диққат билан кузатаётган хорижий етакчи йўқ”, — деди Бернс.
Бернснинг сўзларига кўра, Хитой раҳбарининг Тайван устидан якуний назоратни қўлга киритиш ҳақидаги амбициялари жуда жиддий қабул қилиниши керак, аммо “бу ҳарбий можаро муқаррар дегани эмас”.
“Ҳеч бўлмаганда бизнинг хулосамиз шундан иборатки, Си Цзиньпин ва унинг ҳарбий раҳбарияти бугунги кунда бу босқинни амалга оширишга қодир ёки йўқлигига шубҳа қилмоқда”, — деди Марказий разведка бошқармаси раҳбари.
Си Цзиньпин ўз ҳарбийларига 2027 йилгача Тайван устидан ҳарбий назорат ўрнатишга тайёргарлик кўришга кўрсатма бергани ҳақида МРБ директори ўринбосари Девид Коэн 2022 йил сентябрда маълум қилганди. Аммо Америка разведкаси Хитой раҳбарияти бу борада якуний қарор қабул қилган, деб ҳисобламайди.
Пекин Украина можароси фонида оловга ёғ сепишни тўхтатишга ва “бугун — Украина, эртага — Тайван” мазмунидаги баёнотларни бас қилишга чақирди. 2022 йил октябрь ойида ХХР етакчиси Пекин Тайван билан “тинч йўл билан бирлашиш” тарафдори эканини айтди, бироқ куч ишлатишни истисно этмади.
Изоҳ (0)