Ўзбекистонда 2023 йил март ойидан бошлаб мобил интернет тезлиги оширилади ва мамлакат бўйлаб 5G технологияси жорий этилади. Бу ҳақда “O‘zbektelekom” AK ахборот хизмати раҳбари Темур Мамажонов маълум қилди.
Хабарга кўра, лойиҳа доирасида мавжуд таянч станциялари модернизация қилиниб, янгилари ўрнатилади. Шу жумладан, бутун мамлакат бўйлаб 3 мингдан ортиқ таянч станцияларини энг сўнгги технологиялар бўйича янгилаш, шунингдек, 2 мингдан ортиқ янги таянч станцияларини қуриб ишга тушириш режалаштирилган. Бунда Ўзбекистон бўйлаб мобил алоқа сифати яхшиланади, LTE стандартидаги мобил интернет тезлиги ҳамда унинг қамрови оширилади.
Таъкидланишича, лойиҳанинг муҳим босқичи қатор таянч станцияларини 5G стандартига ўтказиш жараёни ҳисобланади. Натижада абонентлар бешинчи авлод тезлигида мобил интернетдан бемалол фойдаланишлари мумкин бўлади.
“Ўзбекистонда биринчи галда флагман смартфонлар, жумладан, iPhone эгалари 5G технологиясидаги мобил интернетдан фойдаланиш имкониятига эга бўлади. Uztelecom Ўзбекистонда мазкур қурилмалар фойдаланувчиларига бешинчи авлод алоқа имкониятларидан фойдаланиш имконини берувчи биринчи оператор бўлади”, — дейилади хабарда.
2022 йил декабрда рақамли технологиялар вазири Шерзод Шерматов Ўзбекистон аҳолисининг интернет хизматидан фойдаланувчилари сони 31 миллиондан ортганини маълум қилганди. Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган.
Изоҳ (0)