Бутунхитой халқ вакиллари кенгаши депутатлари Хитой раиси Си Цзиньпинни 5 йилга лавозимига қайта сайлади. У мамлакат тарихида учинчи муддатга сайланган илк етакчи бўлди. Си Цзиньпин ХХР Марказий ҳарбий кенгаши раҳбари лавозимини ҳам қайта эгаллади, деб ёзмоқда Sinxua.
Си Цзиньпинни сайлаш қарори бир овоздан қабул қилинди. Овоз беришда 2 952 киши иштирок этди. Бундан ташқари, Давлат кенгаши бош вазирининг биринчи ўринбосари Хан Чжен ХХР вице-президенти этиб сайланди. Хитой Коммунистик партияси Марказий қўмитаси Сиёсий бюроси доимий қўмитаси аъзоси Чжао Лецзи Бутунхитой халқ вакиллари кенгашининг доимий қўмитаси раиси этиб тайинланди.
Овоз бериш кенгашнинг 14-чақирув биринчи сессияси учинчи ялпи мажлисида бўлиб ўтди. Ундан бироз аввал депутатлар ХХР Давлат кенгаши аппаратини ислоҳ қилиш режасини ҳам маъқуллаган. Давлат кенгаши Хитойнинг энг юқори ижро этувчи органидир. Якуний ислоҳот режаси ҳали эълон қилинмаган. Аммо таъкидланишича, у Хитой Коммунистик партиясининг “марказлашган раҳбариятини” кучайтириш ва давлат аппарати самарадорлигини оширишга қаратилган.
Си Цзиньпин 69 ёшда. У 2012 йилда Хитой Коммунистик партияси марказий қўмитаси бош котиби бўлди, 2013 ва 2018 йилларда Хитой Халқ Республикаси раиси этиб сайланди. 2017 ва 2022 йилларда у қайтадан Коммунистик партия Марказий қўмитаси Бош котиби этиб сайланди.
Изоҳ (0)