Тошкент шаҳар Шайхонтоҳур туманида диний мутаассибликни тарғиб қилган 20 ёшли қизга чора кўрилди. Бу ҳақда Ички ишлар вазирлиги ахборот хизмати хабар қилди.
Хабарга кўра, 2023 йилнинг февраль ойида ижтимоий тармоқларда араб давлатларида кенг тарқалган бурқа кийган номаълум аёлнинг “Аёлларб эҳтиёт бўлинг” номли видеолавҳаси тарқалди. Унда аёлларнинг ташқи кўриниши танқидга олингани акс этган.
Ушбу ҳолат юзасидан ўтказилган ўрганишлар давомида мазкур видеоролик муаллифи 2003 йилда Тошкент шаҳрида туғилган, пойтахтдаги олий таълим муассасаларининг бирида таҳсил олувчи фуқаро Қ.Ш. экани аниқланди ва 2 март куни Шайхонтоҳур тумани ИИО ФМБга таклиф этилди.
Суҳбат давомида фуқаро ижтимоий тармоқда аёлларнинг ташқи кўринишига оид муносабатини шахсий диний қарашларидан келиб чиққан ҳолда хорижий сайтларнинг биридан олинган материаллар асосида билдирганини, ҳозирги кунда уй шароитида видеолавҳада кўрсатилган ноанъанавий аёллар либосларини (бурқа) тикиш ва аҳолига сотиш билан шуғулланишини маълум қилди.
Келтирилишича, “Хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисида”ги қонунга асосан жинс бўйича билвосита камситиш, яъни бир жинсдаги шахсларни бошқа жинсдаги шахсларга нисбатан ноқулайроқ ҳолатга тушириб қўядиган вазиятларни, ҳолатларни ёки мезонларни яратиш, шу жумладанб гендер тенгсизликни оммавий ахборот воситалари, таълим, маданият орқали тарғиб этиш, муайян жинсдаги шахслар учун салбий оқибатларга олиб келиши мумкин бўлган шарт-шароитлар ёхуд талаблар белгиланишига йўл қўйилмайди. Ушбу қонуннинг 29-моддасида хотин-қизлар ва эркаклар учун тенг ҳуқуқ ҳамда имкониятлар кафолатлари тўғрисидаги қонунчиликни бузганлик учун жавобгарлик белгиланган.
“Виждон эркинлиги ва диний ташкилотлар тўғрисида”ги қонуннинг 10-моддасига биноан мамлакат ҳудудида диний мазмундаги материалларни тайёрлаш ва тарқатиш диншунослик экспертизасининг ижобий хулосаси олинганидан кейин амалга оширилади. Ушбу қонуннинг 5-моддасига кўра, мамлакатда виждон эркинлигини таъминлашнинг асосий устуворликларидан бири сифатида жамоат тартибига, фуқароларнинг соғлиғи ва ахлоқига, ҳуқуқ ва эркинликларига таҳдид солувчи диний ғоялар ҳамда қарашларнинг сингдирилиши ва тарқатилишига қарши курашиш белгилаб қўйилган.
Шу муносабат билан суд идоралари томонидан фуқаро Қ.Ш.га нисбатан Маъмурий жавобгарлик тўғрисидаги кодекснинг 1842-моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш) билан базавий ҳисоблаш миқдорининг 50 баробари миқдорида жарима жазоси тайинланди.
Аввалроқ Фарғонада муқаддам судланиб, 18 йил қамоқ жазосини ўтаб чиққан шахс вайронкор ғояларга йўғрилган нашидаларни тинглаб, тарқатиб келгани учун яна судлангани ҳақида хабар берилганди.
Шунингдек, Тошкентда танишига нашида юборгани учун қамалган талаба йигит озод қилингани тўғрисида хабар берилганди.
Изоҳ (0)