Ўзбекистон тиббий-илмий фаолият билан шуғулланувчилар академияси ва Япониянинг Киото университети товарлар кимёси ва маҳсулотларни кимёвий таркибини аниқлаш бўйича ўзаро ҳамкорлик қилади. Бу ҳақда академия раиси, профессор Иброҳимжон Асқаров “Дарё”га маълум қилди.
Ўзаро келишув Киото университетида бўлиб ўтган. Университетнинг кимё фанлари бўйича профессори Шаҳбоз Хан билан академия ўртасидаги ҳамкорлик масалалари муҳокама қилинган.
Таъкидланишича, Киото университети профессори Ўзбекистонда халқ табобати фани яратилгани ва амалиётга киритилгани, Ўзбекистонда 11 та тиббиёт олийгоҳларида халқ табобати ихтисосликлари бўйича мутахассислар тайёрланаётганини алоҳида эътироф этган.
“Ушбу ҳамкорлик Ўзбекистонда халқ табобати соҳасида амалга оширилаётган ютуқларимизни халқаро амалиётда татбиқ этиш учун жуда ҳам муҳим. Шунингдек, академия ходимларининг Япония университетларида малака ошириш имкони яратилади”, — деди профессор Иброҳимжон Асқаров.
Аввалроқ Ўзбекистонда тиббий-илмий фаолият билан шуғулланувчи Табобат академияси аъзолари Туркияда малака ошириши ҳақида хабар берилган эди.
Изоҳ (0)