Актриса Луиза Расулова онаси ва ўзини бегона эркак калтаклагани, бунинг оқибатида улар шифохонага ётқизилгани ҳақида ўз ижтимоий тармоқлардаги саҳифасида маълум қилди. Шаҳар Ички ишлар бош бошқармаси ахборот хизмати ҳолат юзасидан расмий изоҳ берди.
Хабарга кўра, 9 март куни соат 15:00 ларда Чилонзор-6 даҳасидаги кўп қаватли уйлардан бирининг уйбошиси 1959 йилда туғилган А.Р. (Луиза Расулованинг онаси) ва шу кўп қаватли уйнинг иккинчи қаватида жойлашган ўқув муассасаси раҳбари 1971 йилда туғилган Б.Ч. билан ўзаро низо келиб чиққан.
Низонинг сабаби А.Р. кўп қаватли уйнинг умумий кириш эшигига кодли қулф қўйиб, иккинчи қаватда жойлашган ўқув муассасасига келган ўқувчиларнинг киришига тўсқинлик қилган. Шу орада Б.Ч. фуқаро А.Р.ни қўлидан тортган вақтида А.Р. ва унинг қизи Луиза Расулова ерга йиқилган.
Луиза Расулова ва унинг онасига тиббий ёрдам кўрсатилиши учун шифохонага ётқизилган. Бирламчи маълумотга кўра, А.Р.да энса соҳаси юмшоқ тўқималарини лат ёйиши, актрисада ўнг билак ва ўнг тизза соҳаси юмшоқ тўқималари лат ейиши жароҳатлари борлиги аниқланган. Фуқаро Б.Ч. профилактика инспектори томонидан ушланиб, яқин орадаги ИИБга олиб борилган.
Мазкур ҳолат юзасидан Чилонзор тумани ИИО ФМБ томонидан терговга қадар текширув ўтказилмоқда. Текширув якуни бўйича қонуний қарор қабул қилиниши таъминланади.
Изоҳ (0)