Кобулда Афғонистонда қазиб олинган нефтнинг биринчи аукциони бўлиб ўтди. Бу ҳақда Афғонистонни назорат қилувчи “Толибон” кончилик ва нефть вазирлигига таяниб, “Интерфакс” хабар берди.
7 март куни тоғ-кон ва нефть вазири вазифасини бажарувчи Шаҳабуддин Делавер иштирокида 20 минг тонна Қашқар нефти ва 7 минг тонна Ангут нефтини сотиш бўйича тендер бўлиб ўтди, деб хабар берди вазирлик матбуот маркази. Қайд этилишича, ким ошди савдоси вазирликнинг Кобулдаги биносида бўлиб ўтган.
“Афғонистонда қазиб олинган нефть бўйича биринчи савдонинг гувоҳи бўлмоқдамиз ва аризачи компаниялар ҳам мамлакат ичида жойлашгани, барча хом ашёни қайта ишлаш Афғонистон ичида амалга оширилиши ғурурлантиради”, — деди вазир вазифасини бажарувчи.
5 январь куни Толибон кон ва нефть вазири ва Хитойнинг CAPEIC нефть ва газ компанияси вакили мамлакат шимолидаги нефть конларини ўзлаштириш бўйича шартнома имзолади.
“Шартнома бўйича Хитой компаниясига берилган конлар майдони 4,5 минг квадрат километрни ташкил этади, улар мамлакатнинг учта вилояти: Сирпул, Жаузжон ва Фарёбда жойлашган”, — дейилади Бахтар давлат ахборот агентлиги хабарида.
Нефть қазиб олишнинг кутилаётган ҳажмлари аста-секин кунига минг тоннадан 23 минг тоннагача ўсиши режалаштирилган.
Хитой сармояси уч йил ичида 150 миллион доллардан 540 миллион долларгача ошади. Геология-қидирув ишларининг давомийлиги уч йилга мўлжалланган. Қазиб олинган нефть Афғонистонда қайта ишланиши керак бўлади.
Афғонистон ушбу лойиҳада 20 фоиз иштирок улуши билан ҳамкор бўлади ва аста-секин бу кўрсаткич 75 фоизгача оширилади. Шартнома муддати — 25 йил. Бу шартнома Афғонистонда Толибон ҳокимият тепасига келганидан бери биринчи халқаро сармоя шартномаси бўлди.
Изоҳ (0)