Очиқланмаган йил якунлари: Ўзбекистон автомобилларни сотишдан кўра кўпроқ сотиб олмоқда
2023 йилнинг январь ойида Ўзбекистон 2 193 та енгил автомобиль импорт қилган. Бу ҳақда “Дарё”га Статистика агентлиги матбуот хизмати раҳбарининг расмий каналидан маълум бўлди.
Маълумотларга кўра, январь ойида мамлакатга 13 та хорижий давлатдан қиймати 58,3 млн долларга автомобиль олиб келинган.
Натижада, енгил автомобиллар импорти ўтган йилнинг мос даври билан солиштирилганда 847 тага камайган.
Ўзбекистоннинг ташқи савдо айланмаси ҳисоботига кўра, январь ойида Ўзбекистоннинг автомобиль экспорти ҳажми 9,9 млн долларни ташкил этди. Бу ўтган йилнинг мос даврига нисбатан 13,4 фоизга кўп.
Шундай қилиб, январь якуни бўйича автомобиль импорти экспортдан 48,4 миллион доллар — 5,8 мартага ошган.
Шу тариқа Ўзбекистон автомобилларни сотишдан кўра кўпроқ сотиб олишда давом этмоқда.
2022 йилнинг октябрь ойидан бошлаб, Ўзбекистоннинг автомобиль импорти кўрсаткичлари “Ташқи савдо айланмаси” ҳисоботидан жой олмайди. Бироқ, Статистика агентлиги матбуот хизмати раҳбарининг расмий каналида ёритилган.
2022 йил якунлари бўйича маълумотлар эса ушбу каналда ҳам, Статистика агентлигининг ҳисоботида ҳам очиқланмай қолган.
“Дарё” мухбирининг масала юзасидан юборган сўровларига “Декабрь ойи учун статистик маълумотлар тез орада ёритилиши, бу ёпиқ маълумот эмаслиги” ҳақидаги изоҳ келган.
Аввалроқ 2022 йилнинг январь—ноябрь ойлари учун автомобиль импорт ва экспорт кўрсаткичлари таҳлил қилинган эди.
