Президент Шавкат Мирзиёевнинг 6 март куни Олий Мажлис Қонунчилик палатаси депутатлари ва Сенати аъзолари, Олий суд раҳбарияти билан учрашувида давлат раҳбари ва халқ вакиллари томонидан Конституцияга ўзгартириш ва қўшимчалар киритиш юзасидан қатор таклифлар берилди.
Учрашувда маҳаллий даражада ҳокимиятлар бўлиниши принципини амалга ошириш, ҳокимларнинг халқ депутатлари Кенгашларига раҳбарлик қилиш институтини тугатиш давлат бошқаруви тизими янгиланишининг мантиқий давоми бўлиши қайд этилди.
Йиғилишда сўзга чиқувчилар томонидан маҳаллий Кенгаш раиси билан ҳоким лавозимини бир-биридан ажратишни босқичма-босқич амалга ошириш таклиф қилинди. Хусусан:
- вилоят Кенгашлари учун навбатдаги сайлов якунига кўра 2024 йилдан;
- туман Кенгашлари учун эса, яратилиши лозим бўлган ҳуқуқий ва ташкилий асосларнинг ҳажми, кадрларда амалий тажрибанинг шаклланишини инобатга олиб, 2029 йилдан киритиш таклифи илгари сурилди.
Бу масалага тўхталар экан, Президент ушбу тартибни туман кенгашларида амалга киритиш учун 6 йил кутиш керак эмаслигини айтди. Янги тартибни туман Кенгашларида 2026 йил бошидан амалга киритиш, тўғри бўлишини ҳамда бунга вилоят кенгашларида тўпланадиган бир йиллик тажриба етарли эканлигини қайд этди.
Изоҳ (0)