Ўзбекистон президенти қарори билан аҳоли томонидан тўловларни амалга оширишда қўшимча қулайликлар яратилади. Бу ҳақда давлат раҳбари матбуот котиби хабар қилди.
Қайд этилишича, 1 майдан бошлаб қуйида келтирилган, бенефисиари бюджет ва корпоратив буюртмачи ҳисобланган тўловлар бўйича тўлов хизматлари кўрсатганлик учун воситачилик ҳақи (йиғимлар) тўлов шаклидан қатъи назар тўловчи – жисмоний шахсдан эмас, балки тўлов суммасидан чегириб қолиш йўли билан ундирилади:
- барча турдаги давлат божи ва маъмурий жарималар бўйича тўловлар;
- давлат хизматлари марказлари томонидан кўрсатиладиган давлат хизматлари, шу жумладан Ягона интерактив давлат хизматлари портали орқали кўрсатиладиган давлат хизматларига тўловлар;
- мактабгача, умумий ўрта, ўрта махсус, профессионал, олий ва олий таълимдан кейинги таълим, қайта тайёрлов, малака ошириш ҳамда соғлиқни сақлаш муассасаларига тўловлар;
- барча турдаги коммунал хизматлар учун тўловлар;
- МИБ органлари томонидан суд ҳужжатлари ва бошқа органлар ҳужжатларини мажбурий ижро этиш бўйича ундириладиган тўловлар;
- “E-auksion” электрон савдо платформаси ва “К-Savdo” автоматлаштирилган ахборот тизимига тўловлар;
- авиа, темир йўл ва бошқа жамоат транспортларига чипталарни харид қилишдаги тўловлар.
Мазкур бандда кўрсатилган тўловларнинг бенефисиари ҳисобланган бюджет ва корпоратив буюртмачилар 2023 йил 1 майга қадар тўлов хизматлари кўрсатишга доир амалдаги шартномаларга тегишли ўзгартиришлар киритилади. Бунда, воситачилик ҳақи (йиғимлар) миқдори тўлов суммасининг бир фоизигача, бироқ жами суммаси Марказий банк томонидан белгиланадиган чегаравий миқдорлардан кўп бўлмаган миқдорда бўлиши лозим.
2023 йил 1 майга қадар Тошкент шаҳрида ҳуқуқий эксперимент тариқасида виртуал касса билан қамраб олинган савдо ва хизмат кўрсатиш шохобчаларида Марказий банк томонидан белгиланадиган чекланган лимит ва кунлик нақд пул тушумлари доирасида нақд пул ечиш хизматини кўрсатиш амалиёти жорий этилади. Бунда, мазкур бандда кўрсатилган нақд пул ечиш хизматини кўрсатиш тартиби Марказий банк томонидан белгиланади.
Шунингдек, Марказий банкка Humo ва Uzcard тўлов тизимлари ўзаро интеграсиясини босқичма-босқич, жумладан 2023 йил май ойига қадар банкоматлар ҳамда 2023 йил якунига қадар тўлов терминаллари тизимини интеграсия қилиш ишларини якунлаш топширилди.
Иқтисодиёт ва молия вазирлиги Марказий банк билан биргаликда 2023 йил 1 сентябрга қадар Ягона ғазна ҳисобварағи орқали ҳисоб-китобларни 24/7 режимида онлайн тартибда амалга ошириш мақсадида Иқтисодиёт ва молия вазирлигининг ахборот тизимини Марказий банкнинг “Тезкор тўловлар” тизимига интеграсия қилишни таъминлайди.
Ушбу ўзгаришлар тўлов хизматлари бозорида илғор тўлов турлари ҳамда усуллари салмоғини ошириш, соғлом рақобат ва янги технологик ечимларни қўллаб-қувватлаш ҳамда аҳолига қўшимча қулайликлар яратиш мақсадида жорий этилади. Қарор ижросини назорат қилиш бош вазир ўринбосари Жамшид Қўчқоров зиммасига юклатилди.
Изоҳ (0)