Туркиядаги зилзилалар оқибатида жабрланганларни қидириш ва қутқаришда Ўзбекистондан келган қутқарувчиларнинг махсус итлари муҳим рол ўйнади, деб ёзади Anadolu агентлиги.
“Итлар вайроналар остидаги инсоннинг тирик ёки вафот этганини сезиб, ўзига хос тарзда ҳаракат қилади. Агарда у вайроналар остида тирик инсонга дуч келса, баландроқ вовуллайди, вафот этган инсонга дуч келса, пастроқ инграйди”, — дейди кинолог Убайдулло Рўзметов.
Рўзметов табиий офат ҳудудида “Барон” лақабли ит билан ишлаган. Кинологлар Ўзбекистон қидирув-қутқарув гуруҳида жами 5 та ит билан кинологлар ишлаган бўлиб, улар вайроналар остидан одамларни топишга ёрдам берган.
“Вазият жуда мураккаб эди. Биз бу қадар вайронкор зилзила оқибатларига илк бор дуч келдик. Қутқарув ишлари олиб борилаётган вақтда ҳам зилзилалар содир бўлди”, — дейди Рўзметов.
Шунингдек, қутқарувчининг сўзларига кўра, ўргатилган итлар вайроналар остида одамларни топишга муаммога дуч келмайди, бироқ мазкур зилзилалар вақтида кўплаб бинолар қулаб тушгани сабаб бу сафар улар қийналган.
6 февраль куни ўзбекистонлик қутқарувчилар Туркияга жўнатилганди. Дастлабки рейсда 100 нафар қутқарувчи билан биргаликда махсус жиҳозлар, кинологик гуруҳлар ва инсонпарварлик ёрдами ҳам юборилган. Жабрланганларга ёрдам бериш учун борган Ўзбекистон ФВВ ходимлари 25 февраль куни ватанга қайта бошлаган. 6 март куни эса Ислом Каримов номидаги Тошкент халқаро аэропортида Мудофаа вазирлигининг тиббий отряд ходимларини оммавий ахборот воситалари, кенг жамоатчилик вакиллари, мудофаа вазири ўринбосари ва бошқа расмийлар кутиб олинган.
Изоҳ (0)