Тошкент метросининг 7-бекати саккиз кунга ёпилади

Тошкент метрополитенининг 7-бекати 11 мартдан бошлаб саккиз кунга ёпилади. Бу ҳақда метрополитен матбуот хизмати хабар берди.

Маълум қилинишича, Тошкент метрополитенининг “Ер усти ҳалқа йўли” йўналиши 6 ва 7-бекатлари оралиғидаги ер устки қисмида Фарғона йўли кўчасидан “Қўйлиқ” деҳқон бозори томон қурилаётган автомобиль йўл ўтказгичининг қурилиш ишлари якунланмоқда.

Шу муносабат билан метрополитеннинг 7-бекати (“Қўйлиқ”) 11 март кунидан 18 март кунига қадар йўловчиларга вақтинча хизмат кўрсатмайди.

“Ер усти ҳалқа йўли” йўналишида поездлар ҳаракати “Дўстлик-2” бекати билан 6-бекат оралиғида ташкил этилади. Йўловчилар учун 6- ва 7-бекат оралиғида қўшимча автобус ҳаракати йўлга қўйилади.

“Келтирилган ноқулайликлар учун узр сўраймиз”, — дейилади метрополитен хабарида.

Эслатиб ўтамиз, Тошкент метрополитени ерусти йўналишининг 2-босқичини қуриш ишлари доирасида 18 февраль куни “Дўстлик-2—7-бекат (Қўйлиқ бозори)” оралиғида метро вагонлари ҳаракати тўхтатилганди.