Чеченистон раҳбари Рамзан Қодировнинг 17 ёшли ўғли Ахмат Қодировнинг никоҳ тўйи бўлиб ўтди. Россиялик машҳур хонанда Тимати интернетда 87 та ҳашаматли машинадан иборат тўй кортежи видеосини жойлаштирди.
Маълум қилинишича, тўй маросимини суратга олиш қатъиян тақиқланган. Бироқ айрим видеолар ижтимоий тармоқларда эълон қилинган. 87 та премиум автомобилга (Bugatti’дан Rolls-Royce’гача) 11 та полиция машинаси ҳамроҳлик қилган. 17 ёшли Ахмат Қодировнинг никоҳ тўйининг аниқ санаси расман маълум қилинмаган. Аммо 4 март куни Чеченистон раҳбари Россия президенти Владимир Путин Ахматни яқинлашиб келаётган тўйи билан табриклаш учун ўғли билан учрашганини айтган.
Таъкидланишича, Рамзан Қодиров тўй куни Чеченистонда турмуш қурганларнинг барчасига 100 минг рубл миқдорида тўлов беришга, тўй харажатини қоплашга ваъда берган. Рамзан Қодировнинг ўғли Ахмат MMA жангларида қатнашади. Чеченистондаги спорт мажмуаси унинг шарафига номланган. У “махсус ҳарбий операция” зонасига ҳам ташриф буюргани хабар қилинган.
Изоҳ (0)