Аёл киши учун энг яхши совға нима? 8 март куни бу савол кўпчилик эркакларни ўйлантириши аниқ. “Дарё” мухбирининг бу саволига ўзбек санъат вакиллари қуйидагича жавоб берди.
Зуҳра Солиева: “Ҳурмат билан ўзим”
Фото: “Дарё”
— Аёлига “Сен нимани яхши кўришингни билмадим”, деб баҳона қиладиган эркаклар кўп. Улар учун эслатма ўрнида айтиб ўтаман. Дунёдаги барча аёлларга ёқадиган совға бу атир билан гулдир. Мени қалбан тушинган инсон жуда қиммат атирдан иккитасини совға қилди. Ундан аввал эса совға олиб, “ҳурмат билан ўзим” деб юрардим. Энг муҳими аёл кишини ҳеч қачон эътиборсиз қолдирмаслик керак, — дейди актриса.
Аҳрор Усмонов: “Совға имкониятга қараб олинади”
— Аёл нозик ҳилқат, унга ҳамиша ширин сўз билан муомала қилиш керак. Эркак учун аёлни ҳурмат қилиш ҳам фарз, ҳам қарздир. Совға имкониятга қараб олинаверади, муҳими ширинсўз бўлиш керак, — дейди хонанда.
Аваз Охун: “Аёлнинг кайфияти оилага таъсир қилади”
— Аёл киши учун энг ёқимли совға тилла тақинчоқ бўлса керак. Чунки аёллар тиллага ишқибоз бўлишади. Ростини айтсам, бирор марта байрамни оила даврасида кутиб олмайман. Оиламизда байрам бир-икки кундан кейин нишонланади. Ҳатто, туғилган кунимда ҳам тўй чиқиб қолса, бераридан қисмасин деб тўйга кетавераман.
Оилада аёл кишининг кайфияти ҳам саломатлиги ҳам кўп нарсаларга таъсир қилади. Агар унда мана шу жиҳатлар яхши бўлмаса, хонадондан файз йўқолади, — дейди сўз устаси.
Афрўза: “Энг яхши совға меҳр”
— Қиз ва аёллар учун энг яхши совға бу меҳр. Совғанинг катта-кичиклиги бўлмайди. Шахсан мен совғанинг нархи эмас, эътибор билан берилгани қувонтиради. Ҳар байрамда дадам биринчилардан бўлиб онам ва менга совға беради. Шахсан оиламдаги бу анъана мени жуда қувонтиради.
Женисбек Пиязов: “Gentra олиб бердим...”
— Бу йил совға ҳақида умуман ўйлаганим йўқ. Чунки ўтган йил аёлимга уч йилга етадиган совға — Gentra автомобилини совға қилгандим. Уч йил етади деганимнинг боиси, уни кредитга сотиб олганман ва ҳар ой пулини тўлаётганимда 8 март байрамини бир эслаб ўтаман. Аёл кишига совға бериш учун байрамни кутиб ўтириш шарт эмас. Яхши кайфиятда, унга бирор таом тайёрлаб берсангиз ҳам қувонади. Муҳими, ҳаммаси эътибор ва чексиз меҳр билан бўлиши керак, — дейди хонанда.
Малика Эгамбердиева: “Аёл эътиборсиз қолмасин”
— Аёл киши учун энг қимматбаҳо совға — эътибор. Аёл эътиборсиз қолди дегани у яшаяпти дегани эмас. Бегонадан олинган совғанинг ўрни бошқа. Аёл биринчи ўринда оила аъзоси, хусусан турмуш ўртоғидан совға кутади. Шахсан мен байрамни оила аъзоларим даврасида ўтказишни хоҳлайман, — дейди хонанда.
Болтабой Тошматов: “Байрамдан кейин 3 ой гаплашмаган”
— Аёл кишига совға олиш ярашаверади. Уларга қанча эътибор қилса шунча кам. Эркакман деб гердайиб юрамиз аммо номимизнинг қолиши, биздан яхши зурриёдларнинг кўпайиши аёлга боғлиқ. Эркак кўчанинг одами. Аёл уйнинг чироғи деб бежиз айтишмайди.
Бир йил қизиқ воқеа бўлди. Аёлимга байрамга машина совға қиламан дедим. У еттинчи осмонларга учиб, мендан машинани кутган. Мен эса сўзимнинг устидан чиқиб унга кир ювадиган машина совға қилганман. Ҳазилимдан аразлаб уч ой гаплашмай юрганди, — дейди сўз устаси.
Баҳриддин Зуҳриддинов: “Умрага йўлланма совға қилдим”
— Ўтган йили онамга Умра сафарига йўлланма совға қилдим. Бу шу кунгача қилган энг яхши совғаларимдан бири бўлди, деёламан. Аслида совғанинг катта-кичиги бўлмайди, — дейди хонанда.
Мустафо: “Тилла тақинчоқлар аёлларни қувонтиради”
— Ҳар доим онамга энг яхши совғаларни беришга ҳаракат қиламан. Назаримда, аёлларни қувонтирадиган совға бу тилла тақинчоқлар бўлса керак. Улар чиройли, қимматбаҳо ва эсталик бўлоладиган совға, — дейди хонанда.
Изоҳ (0)