Жонни Депп ўзи чизган машҳур кишиларнинг суратини 5 миллион 400 минг долларга сотди

Голливуд юлдузи Жонни Депп ўзи чизган машҳур кишиларнинг суратини 5 миллион 400 минг долларга сотди, деб хабар бермоқда “Правила жизни” нашри.

Бу Деппнинг поп-арт услубида яратилган “Дўстлар ва қаҳрамонлар” картиналарининг иккинчи тўплами ҳисобланади. Унда мусиқачи Боб Марли, ёзувчи Хантер Томпсон, актёрлар Хит Леджер ва Ривер Феникснинг портретлари мавжуд.

Лондондаги Castle Fine Art Gallery галереяси атиги беш кун ичида Депп суратини чизган тўртта машҳур шахснинг юзлаб санъат асарларини сотди. Суратнинг ҳар бир нусхаси 5 доллардан, тўртта портретдан иборат тўплам эса 21 доллардан сотилди.

Daily Mail нашрининг ёзишича, сўнгги етти ой ичида Депп ўзи чизган суратлардан 9 миллион 620 минг доллардан ортиқ даромад олган. “Кариб денгизи қароқчилари” фильми юлдузи журналистларга унинг  санъатига қизиқадиган инсонларнинг борлигидан жуда таъсирланганини айтган.

Депп июль ойида биринчи “Дўстлар ва қаҳрамонлар” тўпламини сотувга қўйган эди. Кейинчалик Голливуд юлдузининг арт-принтлари ва рок мусиқалари 780 та нусхада сотилди ва актёр бу орқали 3 миллион 600 минг доллар ишлаб олди.

Аввалроқ рассом дўстлари ва уни илҳомлантирган одамларнинг 11 111 NFТ портретидан иборат тўплами учун тахминан 800 000 доллар даромад олган. У бу маблағларни хайрия ишларига сарфлаган.