Бахмутдаги жангда рус армиясининг йўқотишлари Украинанинг йўқотишларидан бир неча баравар кўп — CNN

Донецк вилоятидаги Бахмут шаҳри учун кечаётган жангларда Россия ҳарбийлари украиналик ҳимоячиларга қараганда беш баравар кўп аскарини йўқотди. Бу ҳақда CNN НАТОдаги манбаларига таяниб хабар берди.

Хусусан, агентлик суҳбатдошининг айтишича, Бахмут ҳудудида ҳалок бўлган ҳар бир украиналик аскарга камида беш нафар ҳалок бўлган рус аскари тўғри келади.

НАТО мулозимининг таъкидлашича, бешга бир нисбати разведка маълумотларига асосланган баҳодир. Унинг қўшимча қилишича, Украина ҳам шаҳарни ҳимоя қилишда катта йўқотишларга дучор бўлмоқда.

Аввалроқ Украина президентининг иқтисодий масалалар бўйича маслаҳатчиси Александр Роднянскийнинг CNN телеканалига берган интервьюсида Бахмут шаҳридан украиналик ҳарбийлар “стратегик чекиниш”и мумкинлигини айтганди.

Украина президенти Владимир Зеленский эса ҳарбий амалдорлар билан учрашиб, Бахмутда украин армияси позициясини мустаҳкамлаш ҳақида гапирган. Бунинг фонида Зеленский ва генерал Валерий Залужний ўртасида Бахмут борасида келишмовчилик юзага келгани хабар қилинди. Жумладан, генерал Бахмутдан эрта чекиниш борасида гапирган.

Россия армиясининг эътибори Донецк ва яқин атрофдаги қишлоқларга қаратилган бўлиб, Москва Бахмутдаги қаршиликни якунлаш учун у ерда катта ресурсларини тўплаган.