АҚШ Шимолий Кореянинг Тинч океанида синовдан ўтказадиган қитъалараро ракетасини уриб туширишга уринса, Пхенян буни уруш эълон қилиниши деб билади. Бу ҳақда КХДР етакчисининг синглиси, Шимолий Корея Меҳнат партияси Марказий қўмитаси бўлим бошлиғи ўринбосари Ким Ё Чжон маълум қилди, унинг сўзларини Корея марказий телеграф агентлиги келтирди.
“Агар стратегик қуролларимиз қўшни давлатлар хавфсизлигига таҳдид солмайдиган вазиятда, Америка юрисдиксиясидан ташқаридаги ҳаво ҳудудида, очиқ денгизда синовдан ўтказилаётган вақтда уларни тутиб олиш каби ҳаракатлар амалга оширилса, КХДР томонидан бу очиқ уруш эълон қилиш сифатида қабул қилинади”, — деди Ким Ё Чжон.
У Жанубий Корея ОАВлари февраль ойида АҚШ Қуролли кучларининг Ҳинд-Тинч океани минтақасидаги қўмондонлиги раҳбари КХДР Тинч океани йўналишида қитъалараро баллистик ракета учирса, уни зудлик билан уриб тушириши мумкинлигини айтгани ҳақидаги хабарларига ҳам муносабат билдирди. Шимолий Корея етакчисининг синглиси бундай баёнотларни номақбул ва “аҳмоқона” деб ҳисоблади, бироқ бундай таҳдидлар бўлиши мумкинлигини истисно этмади.
“Бу шундоқ ҳам ҳақиқатга тўғри келмаса-да, мен сизни қатъий огоҳлантираман: Тинч океани АҚШ ёки Япония ҳудуди эмас”, — деди Ким Ё Чжон.
Вашингтон “ўз ҳовлиси” деб биладиган Тинч океанида Америка стратегик қуролларини тутиб олинишига АҚШнинг муносабатини кўриш “қизиқ” бўларди, деди у. Шунингдек, Ким Ё Чжон АҚШ ва Жанубий Корея расмийларига вазиятни янада оғирлаштирадиган бундай гап-сўз ва ҳаракатлардан тийилишни маслаҳат берди.
Аввалроқ Шимолий Корея стратегик қанотли ракеталарни синовдан ўтказгани маълум қилинганди. Уларнинг барчаси Япон денгизи томонга учирилган.
Изоҳ (0)