Фарғона шаҳри Аҳмад Яссавий кўчасидаги хонадонда 26 декабрь куни номаълум моддадан заҳарланиш оқибатида 2 йигит ҳалок бўлди. Бу ҳақда вилоят прокуратураси ахборот хизмати хабар берди.
Аниқланишича, шаҳар ички ишлар органи фаолиятини мувофиқлаштириш бўлимига Б.Э. хонадонида танишлари А.А. ва Х.М. билан биргаликда номаълум моддадан заҳарлангани, улардан икки нафари воқеа жойида вафот этгани, фуқаро Х.М. эса оғир аҳволда шифохонага ётқизилгани тўғрисида хабар келиб тушган.
Мазкур хабарга асосан ҳодиса жойи шаҳар прокурори раҳбарлигида суд тиббий экспертиза бўлими эксперти, тезкор-тергов гуруҳи, ФВБ Фарғона шаҳри бўлими, СЭО ва ЖШ шаҳар бўлими ва “Ҳудудгаз Фарғона” шаҳар бўлими ходимларидан иборат мутахассислар иштирокида кримтехника воситалари ёрдамида кўздан кечирилган.
Жасадлар кўздан кечирилганида, уларда ташқи тан жароҳатлари ва улардан қолган излар аниқланмаган. Терговга қадар текширув натижасига кўра, фуқаролар Б.Э. ва А.А.нинг ис газидан заҳарланиб вафот этгани ҳолати бўйича прокуратура томонидан Жиноят процессуал кодексининг 83-моддаси 2-бандига асосан жиноят иши қўзғатиш рад этиш ҳақида қарор қабул қилинган. Мазкур қарорнинг қонунийлиги ўрганилиб бекор қилинган ва ҳозирда қўшимча терговга қадар текширув ҳаракатлари ўтказилмоқда.
Эслатиб ўтамиз, Ўзбекистонда 2022 йилда ис газидан заҳарланиш билан боғлиқ 90 дан ортиқ ҳолат содир бўлган. Бунинг оқибатида 146 киши вафот этган, яна 50 нафар фуқаро жабрланган. Ички ишлар вазирлиги фуқароларни кўмир, ўтин, нефть маҳсулотлари ва бошқа турдаги ёқилғидан фойдаланишда хавфсизлик чораларига қатъий риоя қилишга ва ностандарт ёки сертификатга эга бўлмаган иситиш печларидан фойдаланмасликка чақирган.
Изоҳ (0)