Қашқадарё вилоятида банк мажбуриятларига кирмайдиган, ечими бошқа ташкилотларга боғлиқ ваъдани бериб, мижозини алдаган банкирга ҳайфсан берилди. Бу ҳақда “Дарё”га АТ “Aloqabank” ахборот хизмати раҳбари Зуҳра Юнусова хабар берди.
“Дарё”да “Банкирларга алдандим — машинага пул тўлаб, ололмаётган мижоз ҳасрати” сарлавҳали мақола эълон қилинган бўлиб, унда Қашқадарё вилоятининг Қарши туманида яшовчи фермер Бекзод Фармонов яхши ният билан ҳосилидан орттирган маблағига янги машина харид қилмоқчи бўлгани, шу мақсадда банкка бориб, қиммат автомобиллардан бирига тўлов қилгани, бироқ банк ходимининг айби билан тўлаган пули автосалон ҳисоб рақамига тушмагани сабаб машина ололмай сарсон бўлаётгани маълум қилинганди.
АТ “Aloqabank” ахборот хизмати мазкур мақолага муносабат билдириб, банк мансабдорига ҳайфсан қўлланганини очиқлади.
“Мижоз Сафарова Мухаррам Дияровна (мурожаатчининг онаси) АТ ‘Aloqabank’ Қашқадарё ҲКХКМнинг ‘Бешкент’ КХКМида 2022 йил 8 июль куни ‘Автосаноат GM’га Chevrolet Gentra автомашинаси сотиб олиш мақсадида 65 миллион 567 минг сўм ва 12 миллион 611 минг сўм тўлов қилган. ‘Бешкент’ КХКМ оператори Г.Мурадовадан олинган тушунтириш хатида Cоlvir АBТ дастурида 65 миллион 567 минг сўм тўловни соат 16:29:07 да ва 12 миллион 611 минг сўмни соат 16:36:48 да яратганини ҳамда МUNIS тизимдан ўтказганини ёзган. Юқоридаги амалиётларнинг тўғри ва ўз вақтида бажарилиши кетма-кетлиги ўрганилганда Cоlvir АBТ тизимда соат 16:29:07 да қабул қилинган биринчи тўлов 65 миллион 567 минг сўм соат 17:30:13 да тизим офлайн режимга ўтказилгани сабаб (МUNIS тизими соат 17:30 да офлайн режимга ўтказилган) бажарилмагани; қабул қилинган иккинчи тўлов 12 миллион 611 минг сўм пул эса соат 16:36:48 да яратилган ҳамда 17:27:55 да муваффақиятли бажарилгани аниқланди”, — дейилади расмийлар муносабатида.
Қайд этилишича, 2022 йил 14 сентябрь куни мижоз тўловларидан 65 миллион 567 минг сўм пул ҳақиқатан ҳам кўрсатилган ҳисобрақамга ўтмай қолгани сабаб мижоз тақдим этган бошқа шартномага асосан кўрсатилган ҳисобрақамга қайта кўчирилган.
“Фуқаро мурожаатида йўллаган видео ва аудиоёзувлар ўрганилганда, ҳақиқатан Қашқадарё ҲКХКМ директори Алишер Мирзаев фуқаро билан суҳбатида ўз лавозими ва банк мажбуриятларига кирмайдиган ҳамда ечими бошқа ташкилотларга тааллуқли бўлган ваъдаларни бергани, натижада мижознинг ҳақли эътирозига сабаб бўлгани аниқланди. Юқоридагилардан келиб чиқиб, хато ва камчиликка йўл қўйган масъул ходимларга нисбатан қонунчиликда белгиланган тартибда чоралар кўрилди ва ҳайфсан берилиши белгиланди”, — дейди банк ахборот хизмати раҳбари.
Банк ахборот хизмати раҳбарининг “Дарё” нашрининг қайта сўровига жавобан аниқлаштиришича, филиал раҳбари Алишер Мирзаевга ҳайфсан берилган. Хатога йўл қўйган ходимга эса огоҳлантириш қўлланган.
Изоҳ (0)