Яшнобод туманида автобус ҳайдовчилари йўловчи талашиб муштлашгани тўғрисида хабар берилганди. Тошкент шаҳар судларининг маълум қилишича, ҳайдовчилар жавобгарликка тортилган.
Қайд этилишича, 2 март куни жиноят ишлари бўйича Яшнобод туман судида Маъмурий жавобгарлик тўғрисидаги кодекснинг 183-моддаси (майда безорилик) бўйича 32 ёшли Н.Б. ҳамда 28 ёшли М.М. га нисбатан юритилган маъмурий иш кўриб чиқилган.
Суд мажлисида аниқланишича, улар 28 февраль куни соат 08:30 ларда Яшнобод тумани Иззат кўчасида ўзларига бириктирилган автобусларни бошқариб, ҳаракат давомида бир-бирларига йўл бермасдан келиб, шу кўчада жойлашган 76-сонли автобекат олдида тўхтаган. Шундан сўнг ҳайдовчилар жамоат жойида жамиятда юриш-туриш қоидаларини қасддан менсимасдан, ўзаро жанжаллашиб, бекатда турган фуқаролар олдида бир-бирларини уятли сўзлар билан ҳақорат қилган ва фуқаролар осойишталигини бузиб, майда безорилик содир этган.
Жиноят ишлари бўйича Яшнобод туман судининг қарори билан Н.Б. ва М.М.нинг ҳар бирига Маъмурий жавобгарлик тўғрисидаги кодекснинг 183-моддаси билан 7 суткадан маъмурий қамоқ жазоси тайинланган.
Ушбу қарор устидан қонунчиликда белгиланган тартиб ва муддатларда Тошкент шаҳар судига апелляция шикояти ёки протест берилиши мумкинлиги маълум қилинган.
Изоҳ (0)