АҚШ разведкаси америкалик дипломатлар орасида учраётган “Гавана синдроми” касаллигига бошқа давлатларнинг, жумладан ОАВ хабарларида айтилганидек Россиянинг алоқадорлиги борасида ҳеч қандай далил топмади. Бу ҳақда Associated Press узоқ давом этган текширув натижасида тайёрланган ҳисоботга таяниб ёзмоқда. Ҳужжат мазмунини журналистларга исмини ошкор қилмаслик шарти билан икки амалдор ошкор қилди. Шунингдек, хулосалар ҳақида ABC телеканали АҚШ Миллий разведкаси раҳбари Эврил Хейнсга таяниб хабар берди.
Бир неча йил давомида АҚШнинг етти агентлиги ва разведка хизматлари томонидан кенг кўламли текширув ўтказилди, унинг бир қисми сифатида 96 мамлакатда “Гавана синдроми”га чалиниш бўйича 1500 га яқин ҳолат ўрганилди.
Йигирмага яқин иш алоҳида синчковлик билан баҳоланди — уларнинг ҳеч бирида Қўшма Штатларга нисбатан дўст бўлмаган давлатларнинг касалликни қасддан яратгани ҳақида далил топилмади. Аксинча, деб ёзади AP, тергов “бошқа давлатлар бунга алоқадор эмаслиги ҳақида далиллар” олди. Разведка, шунингдек, “Гавана синдроми” Америка дипломатик миссияларида кимнингдир беихтиёр, масалан, эшитиш қурилмаларидан фойдаланиши туфайли юзага келган бўлиши мумкинлиги ҳақидаги версияни рад этди.
Тергов муаллифларининг хулосасига кўра, аксарият ҳолатлар турли сабабларга кўра юзага келмоқда — яширин касалликлардан тортиб кундалик ҳаётда ишлатиладиган оддий қурилмаларнинг электромагнит таъсиригача.
АҚШнинг Кубадаги элчихонаси ходимлари илк бор 2016 йилда “гавана синдроми”га дучор бўлишганди. Ўшандан бери шунга ўхшаш ҳодисалар Ўзбекистон, Хитой, Россия ва Австриядаги дипломатларда аниқланди, деб ёзади WSJ. 2021 йилда НАТО таркибига кирувчи давлатлардан бирида америкалик дипломатлар биринчи марта “Гавана синдроми”дан шикоят қилишди —ҳодиса Германияда содир бўлди.
2018 йилдан бери ОАВ АҚШ разведка идоралари Россиянинг “Гавана синдроми”га алоқадорликда гумон қилаётгани ҳақида ёзмоқда. Расмий Вашингтон бу борада Москвани бирор марта айбламаган.
Изоҳ (0)