Ўзбекистонда пиёдалар учун сариқ жилетлардан фойдаланиш тартиби жорий этилади

Ўзбекистонда эндиликда йўл-транспорт ҳодисаларининг олдини олиш мақсадида йўлакларда ҳаракатланувчи пиёдалар учун сариқ жилетлардан фойдаланиш тартиби жорий этилади, деб хабар бермоқда ЎзА.

Қайд этилишича, йўл-транспорт ҳодисаларининг олдини олиш, йўлларда ҳаракат хавфсизлигини таъминлаш мақсадида ҳамда ҳуқуқбузарликларнинг олдини олиш, жиноятчиликка қарши курашиш ва уларнинг юзага келиб чиқиш сабабларини аниқлаш, йўл ҳаракати хавфсизлигини таъминлашга қаратилган дастурлар доирасида куннинг қоронғи қисмида келгусида мактаб ўқувчилари, велойўлакда ҳаракатланувчи шахслар ва пиёдалар учун нур қайтаргичли жилетлардан фойдаланиш тартиби жорий этилади.

Ички ишлар вазирлиги жамоат хавфсизлиги департаменти матбуот котиби Музифа Султонованинг таъкидлашича, мактаб ўқувчилари ҳомийлик кўмаклари асосида нур қайтаргичли жилетлар билан таъминланади.

Аввалроқ Ўзбекистонда соатига 60 км тезлик белгиси ўрнатилган жойларда камералар ушбу чекланган тезлик бўйича жарималарни қайд этаётгани тўғрисида хабар берилганди. Прогнозлаштириш ва макроиқтисодий тадқиқотлар институтига кўра, шаҳарларда энг юқори тезликни соатига 10 км га камайтириш ўлим даражасини йилига 0,8 кишига (ҳар 100 000 кишига) камайтиришда ёрдам беради. Ўзбекистон учун бу 614 нафар инсоннинг ҳаётини сақлаб қолиш деганидир.