Ўзбекистонда 2023 йилда маҳаллалар инфратузилмасини ривожлантиришга давлат бюджетидан 4 триллион сўм ажратилади. Бу борадаги давлат дастури президент фармони билан тасдиқланди.
Ҳужжат билан ташаббусли бюджет амалиётини ҳамда маҳаллаларнинг молиявий мустақиллигини кенгайтириш белгиланган бўлиб, унга кўра 2023 йилда жамоатчилик фикри асосида шакллантириладиган лойиҳаларни молиялаштириш учун давлат бюджетидан 8 триллион сўм, шундан “Обод қишлоқ” ва “Обод маҳалла” дастурлари учун 4 триллион сўм йўналтирилади.
Бундан ташқари, 2023 йилда маҳаллалар инфратузилмасини ривожлантириш бўйича лойиҳалар дастурлари доирасида амалга ошириладиган тадбирларни молиялаштириш учун давлат бюджетидан 4 триллион сўм ажратилади.
Иқтисодиёт ва молия вазирлиги уч ой муддатда лойиҳаларни жамоатчилик фикри ва “Очиқ бюджет” порталида тўпланган овозлар асосида молиялаштиришнинг самарали тизимини яратиши ва амалиётга киритиши лозим.
“Бунда, овоз бериш жараёнларини холис ва маъмурий аралашувларсиз ташкиллаштиришнинг аниқ механизмларини жорий қилишга алоҳида эътибор қаратилсин”, — дейилади фармонда.
Февраль бошларида Шавкат Мирзиёев маҳаллаларда ижтимоий ва ишлаб чиқариш инфратузилмасини яхшилаш учун Тошкент шаҳрига 1,4 триллион сўм маблағ йўналтирилаётганини маълум қилганди. Ундан олдинроқ эса 2023 йили Наманганда инфратузилмани яхшилашга 1,3 триллион сўм йўналтирилиши айтилганди.
Изоҳ (0)