«Дарё» интернет нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 12-сони мавзуси «Жамоат транспорти муаммолари» бўлиб, дастур меҳмони сифатида иқтисодчи Отабек Бакиров таклиф этилди.
Президентнинг танқидигача 900 та автобус бўлган бўлса, ҳозир 1050–1100 тага етди, шу билан баҳорда яна мингта қўшилади, икки мингта автобус билан ҳаммаси жойига тушиб кетади, деб ўйлаш нотўғри. Жамоат транспортининг сифатини яхшилаш ва комплексли таъминлаш учун ҳал қилиш керак бўлган таркибий масалалар ҳам бор. Булардан бири — шаҳарга киришдаги боғланмалар масаласи. Шаҳарга ташқаридан кунига 150 мингта машина киради.
Президентнинг иккита қарори чиқди: биринчисида 12 та боғланма яратиш, иккинчисида 16 та боғланма яратиш айтилган эди. Қарорлардан бирортаси ҳали ечилмади. Шаҳар экотизимини бир қаранг, Янгийўл, Зангиота, Чиноздан, Чирчиқ, Бўстонлиқдан, Оҳангарон томонлардан жуда катта миқдорда машина кириб келади. Агар тўрт йўналишда боғланмалар яратилса ҳамда шаҳар ташқарисида яшовчилар ўз транспортини боғланмада қолдириб, Тошкентга жамоат транспортида келадиган бўлса, шаҳар янада енгиллашади.Яна бир масала — пиёда юриш инфратузилмаси. Масалан, Мустақиллик йўли, Шароф Рашидов кўчаларидан юриб маза қиласан одам. Кўча ҳам, тротуар ҳам — одамлар учун. Одам нега таксига ўтиради? Эшигининг тагигача етиб боришга ҳаракат қилади, чунки йўл инфратузилмаси ёмон. Бирозгина, 500–800 метр юришдан ўзини чеклайди.
Бунёдкор кўчасини қаранг, ерости туннелидан чиқиб Чилонзор томон юрсангиз, йўлнинг пиёдалар учун ажратилган қисми машиналар ёки бизнес эгалари томонидан тўлиқ эгаллаб олинган. Бундан 15 йилча аввал туннелдан «Собир Раҳимов» (ҳозирги «Олмазор») метро станциясигача дарахтлар орасидан пиёда, эркин юриб боришингиз мумкин эди. Жамоат транспорти — фақат автобус эмас, танловлар борлиги, пиёда юриш инфратузилмасининг мавжудлиги ҳам.
Кўпчиликда шундай фикр шаклланиб қолган: йўллар — автомобиллар учун. Аслида, шаҳар ичида кўча, шаҳар ташқарисида эса йўл деган тушунча бор. Кўчанинг эгаси эса, биринчи навбатда, одамлар. Ривожланган мамлакатларда кўчанинг пиёдалар юрадиган қисми автомобиллар юрадиган қисмдан кенгроқ. Бундай йўллар бизда ҳам йўқ эмас, масалан, «Беруний» метросидан талабалар шаҳарчасига қараб юришда эрталаб ва кечқурун гуррос келаётган одамларни кўрасиз. Ҳақиқий соғлом шаҳарда одамлар кўчада юриши, жамоат транспортидан фойдаланиши керак, — дейди Отабек Бакиров.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)