Андижон шаҳрида фуқарони хорижга ишга киритиб қўйишни ваъда қилган сохта тадбиркорлар ушланди. Бу ҳақда Иқтисодий жиноятларга қарши курашиш департаменти хабар қилди.

Қайд этилишича, Бош прокуратура ҳузуридаги департаментнинг Андижон вилоят бошқармаси томонидан тезкор тадбир ўтказилган. Унда фуқаролар Т.А. ва Ж.М. олдиндан ўзаро тил бириктириб, фуқаро А.га гўёки ўзларини Тошкент шаҳридаги хусусий бандлик агентлигининг вилоят филиали ходимлари сифатида таништирган. Уни Корея давлатидаги кемасозлик заводига ишга киритиб қўйишни 11 минг долларга келишиб, олдиндан 700 долларини олган вақтида ашёвий далиллар билан ушланган.

Ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилган. Ҳозирда тергов ҳаракатлари ўтказилмоқда.