Наманганда газ заправкалар фаолияти тўхтатилмаслиги маълум қилинди

Наманган вилоятидаги газ тўлдириш шохобчалари фаолияти тўхтатилмайди, аксинча уларнинг иш фаолияти узлуксизлигини таъминлаш чоралари кўрилмоқда, деб хабар бермоқда Энергетика вазирлиги. 

Хабарга кўра, ижтимоий тармоқда “Наманганда газ қуйиш шохобчалари фаолияти 2-3 кунга чекланади” мазмунида хабар эълон қилинган. Қайд этилишича, ушбу хабар мутлақо асоссиз бўлиб, бугунги кунда нафақат Наманган вилоятида, балки республика бўйича газ тўлдириш шохобчалари фаолияти тўхтатилиши кўзда тутилмаган.  

“Ҳозирда аҳоли хонадонлари ва ижтимоий соҳа объектлари етарли босимда табиий газ таъминотига эга бўлгани учун газ тўлдириш шохобчалари фаолиятини тўхтатишга эҳтиёж мавжуд эмас”, дейилади вазирлик баёнотида.