Анқара ҳозирда Швециянинг НАТОга аъзо бўлиш ҳақидаги аризасини маъқуллай олмайди, деди Туркия ташқи ишлар вазири Мевлут Чавушўғли венгриялик ҳамкасби билан бўлиб ўтган матбуот анжуманида.
“Швеция ва Финляндия НАТОга аъзо бўлиш учун ўз зиммаларига олган маълум мажбуриятлар бор. Швециядан бу қадамларнинг барчаси ҳам амалга оширилаётганини кўрмаяпмиз, шу боис ҳозирги босқичда унинг алянсга киришини маъқуллай олмаймиз”, — дейди Туркия вазири.
У Швеция ҳукумати баъзи мажбуриятларни бажаргани, хусусан, конституцияга ўзгартиришлар киритганини қайд этди. Айни пайтда Туркияда террорчи сифатида тан олинган Курдистон ишчилар партияси ҳамон мамлакатда фаолият олиб бормоқда.
Чавушўғли, вазият кўпроқ НАТО учун муаммо эканини, Анқаранинг Швеция ва Финляндия билан ўзаро муносабатларда бошқа даъвоси йўқлигини таъкидлади.
Швеция ва Финляндия НАТОга аъзо бўлиш учун ариза берган
2022 йилнинг май ойида Швеция ва Финляндия НАТОга аъзо бўлиш учун расмий ариза топширган эди. Бунгача ҳар икки давлат ҳарбий бетарафлик сиёсатига амал қилган. Алянсга қўшилиш учун ариза бериш тўғрисидаги қарор Россиянинг Украинадаги босқини фонида қабул қилинган.
Швеция ва Финляндиянинг НАТОга аъзо бўлиши учун алянснинг барча аъзолари уларнинг аризаларини қўллаб-қувватлашлари керак. Иттифоқнинг 30 аъзосидан фақат Венгрия ва Туркия аризаларни ратификация қилмаган. Анқара айни пайтда икки давлатга ўз ҳудудидаги курд гуруҳларини қўллаб-қувватлашни тўхтатиш талабини илгари сурди. Туркия расмийлари, шунингдек, Швециядан “террорчиликда гумонланувчиларни” Анқарага экстрадиция қилишни талаб қилди. Кейинчалик Туркия Швеция ва Финляндия ҳали бу талабларни бажармаганини бир неча бор таъкидлади.
Изоҳ (0)