Америкалик миллиардер Украина учун 15 та Land Cruiser “тез ёрдам” машиналарини сотиб олмоқда

Келиб чиқиши украин бўлган америкалик миллиардер Билл Экман Украинага ихтисослаштирилган “тез ёрдам” машиналари сотиб олиш учун 3,25 миллион доллар хайрия қилди. Бу ҳақда Reuters хабар бермоқда.

Қайд этилишича, Экман томонидан ажратилган маблағ 15 та Toyota Land Cruiser тез тиббий ёрдам машинасини харид қилиш ва уларни фронтда ишлатиш харажатларини қоплайди.

Тез ёрдам машинаси версиясидаги битта Land Cruiser тахминан 116 минг доллар туради. Бундай машиналарнинг том қисми баланд бўлиб, бу тиббиёт ходимларига жабрланганларга тик турган ҳолда ёрдам кўрсатиш имконини беради.

Катта бобоси Украинадан АҚШга кўчиб ўтган Экманнинг бойлиги Forbes маълумотларига кўра 3,5 миллиард долларга тенг. Экман ва унинг рафиқаси Нери Оксман ўз бойликларининг катта қисмини хайрия ва тиббий тадқиқотлардан тортиб, Гаитидаги зилзила жабрдийдаларига ёрдам кўрсатишгача бўлган ташаббусларни қўллаб-қувватлашга сарфламоқда.

Январь ойида Украина Қуролли кучлари Олий бош қўмондони Валерий Залужний асли украин бўлган америкалик Григорий Степанецдан 1 миллион доллар мерос олганди. У ушбу пулларни Украина армияси эҳтиёжларига сарфлаш учун хайрия қилган.

Жами ҳисобда, ўтган йил давомида жисмоний шахслар ва корхоналар Украина Қуролли кучларига қарийб 500 миллион доллар хайрия қилди, бу Украинага инсонпарварлик ёрдами учун ажратилган хайрия миқдоридан сезиларли даражада яъни 20 миллион долларга кўп. “Суспилне” сўровига кўра, барча украиналикларнинг тўртдан бир қисми (24 фоиз) можаро пайтида ўз армияси эҳтиёжлари учун маблағ ажратган. Хусусан, ресторанларда ташриф буюрувчиларга ҳисобни тўлаш пайтида ҳарбийлар учун оз миқдорда хайрия қилиш таклиф қилинади.