Бизнес-омбудсман девони ходимлари томонидан Қурилиш вазирлиги, унинг ҳудудий бошқармалари ва туман (шаҳар) бўлимларида тадбиркорлик субъектларининг ҳуқуқлари ҳамда қонуний манфаатларига риоя этилиши бўйича ўрганиш ўтказилди. Бу ҳақда тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил матбуот хизмати хабар қилди.
Қайд этилишича, ўтказилган ўрганишларда Қурилиш вазирлиги ва унинг ҳудудий бош бошқармалари ходимлари томонидан 1 326 та ҳолатда тадбиркорлик субъектларининг ҳуқуқлари ва қонуний манфаатлари билан боғлиқ қонун ҳужжатлари талабларининг бузилишига йўл қўйилгани аниқланган. Жумладан, турли давлат хизматларини кўрсатишда 90 нафар ходим томонидан 1 091 та ҳолатда белгиланган муддатларни кечиктириш, ортиқча ҳужжатлар талаб қилиш, мурожаатни асоссиз рад этиш каби қонун бузилиш ҳолатларига йўл қўйилган.
Шунингдек, тадбиркорларнинг рухсат бериш билан боғлиқ мурожаатларини кўриб чиқишда Фарғона вилоятида 8 та, Тошкент шаҳрида 3 та ҳолатда лицензиялаш ҳамда рухсат бериш тартиб-таомиллари тўғрисидаги қонунчилик талаблари бузилган.
Бундан ташқари, амалдаги тартибга асосан, лицензияловчи орган томонидан лицензия бериш масаласини кўриб чиқиш муддати 7 иш куни қилиб белгиланган бўлса-да, вазирлик марказий аппарати ходимлари томонидан 7 та ҳолатда мазкур муддатнинг бузилишига йўл қўйилган.
Тадбиркорлик субъектларининг мурожаатларини кўриб чиқилиши ўрганилганда 197 та ҳолатда қонунчиликка зид равишда мурожаатларни кўриб чиқиш муддатлари ўтказиб юборилган.
Бундан ташқари, тадбиркорлик субъектлари фаолиятида 20 та ҳолатда ўтказилган ўрганишлар бизнес-омбудсманни хабардор қилмасдан амалга оширилган.
Юқоридаги қонун бузилиш ҳолатларига йўл қўйилгани учун вазирлик ва унинг ҳудудий бош бошқармаларининг 143 нафар ходимига нисбатан маъмурий жавобгарлик тўғрисида баённомалар расмийлаштирилиб, кўриб чиқиш учун судларга юборилган.
Аввалроқ Ўзбекистонда автомобиль йўлларини сифатсиз таъмирлаган 7 та буюртмачига 468 млн сўмдан ортиқ маблағ тўлаб берилмагани, Сирдарёда «Обод қишлоқ» қураман деб 1,5 млрд сўмдан ортиқ маблағни ўзлаштирган мансабдорлар аниқлангани, Давлат солиқ қўмитаси қурилиш соҳасида энг кўп учраётган солиқдан қочиш схемалари ҳақида маълумот бергани ҳақида хабар берилган.
Изоҳ (0)