Kelib chiqishi ukrain bo‘lgan amerikalik milliarder Bill Ekman Ukrainaga ixtisoslashtirilgan “tez yordam” mashinalari sotib olish uchun 3,25 million dollar xayriya qildi. Bu haqda Reuters xabar bermoqda.
Qayd etilishicha, Ekman tomonidan ajratilgan mablag‘ 15 ta Toyota Land Cruiser tez tibbiy yordam mashinasini xarid qilish va ularni frontda ishlatish xarajatlarini qoplaydi.
Tez yordam mashinasi versiyasidagi bitta Land Cruiser taxminan 116 ming dollar turadi. Bunday mashinalarning tom qismi baland bo‘lib, bu tibbiyot xodimlariga jabrlanganlarga tik turgan holda yordam ko‘rsatish imkonini beradi.
Katta bobosi Ukrainadan AQSHga ko‘chib o‘tgan Ekmanning boyligi Forbes ma’lumotlariga ko‘ra 3,5 milliard dollarga teng. Ekman va uning rafiqasi Neri Oksman o‘z boyliklarining katta qismini xayriya va tibbiy tadqiqotlardan tortib, Gaitidagi zilzila jabrdiydalariga yordam ko‘rsatishgacha bo‘lgan tashabbuslarni qo‘llab-quvvatlashga sarflamoqda.
Yanvar oyida Ukraina Qurolli kuchlari Oliy bosh qo‘mondoni Valeriy Zalujniy asli ukrain bo‘lgan amerikalik Grigoriy Stepanetsdan 1 million dollar meros olgandi. U ushbu pullarni Ukraina armiyasi ehtiyojlariga sarflash uchun xayriya qilgan.
Jami hisobda, o‘tgan yil davomida jismoniy shaxslar va korxonalar Ukraina Qurolli kuchlariga qariyb 500 million dollar xayriya qildi, bu Ukrainaga insonparvarlik yordami uchun ajratilgan xayriya miqdoridan sezilarli darajada ya’ni 20 million dollarga ko‘p. “Suspilne” so‘roviga ko‘ra, barcha ukrainaliklarning to‘rtdan bir qismi (24 foiz) mojaro paytida o‘z armiyasi ehtiyojlari uchun mablag‘ ajratgan. Xususan, restoranlarda tashrif buyuruvchilarga hisobni to‘lash paytida harbiylar uchun oz miqdorda xayriya qilish taklif qilinadi.
Izoh (0)