Франция, Германия ва Буюк Британия Киевни Москва билан тинчлик музокараларини бошлашга ундаш учун Украина ва НАТО ўртасида яқинроқ алоқа ўрнатиш масаласини кўриб чиқмоқда. Бу ҳақда The Wall Street Journal нашрига уч мамлакат ҳукуматлари вакиллари аноним тарзда маълум қилишди.
Ўтган ҳафта Британия бош вазири Риши Сунак Украинага уруш тугаганидан кейин мудофаа учун илғор ҳарбий техника, қурол ва ўқ-дорилардан кенгроқ фойдаланиш имконини берувчи келишув лойиҳасини таклиф қилганди. Унинг сўзларига кўра, бу режа июль ойида НАТО саммитида муҳокама қилинади.
Франция, Германия ва Британия расмийларининг айтишича, Франция ва Германия бу ташаббусни қўллаб-қувватлаган. Улар буни Украинада ишончни мустаҳкамлаш ва мамлакат расмийларини тинчлик музокаралари сари ундаш деб билмоқда.
“Таклиф этилаётган келишувнинг яна бир мақсади Россияга таъсир ўтказишдир”, — деди Британия манбаси газетага. “Агар Россия келажакда Ғарб Украинага ҳарбий ёрдамни кенгайтиришга тайёрлигини кўрса, бу Москвани ҳарбий мақсадларига эриша олмаслигига ишонтиради”, — дея тушунтирди у.
Шу билан бирга, The Wall Street Journal манбалари бу музокаралар қачон ва қандай шароитда бошланиши ҳақидаги ҳар қандай қарорни Киев қабул қилиши кераклигини айтди.
Газетанинг суҳбатдошларига кўра, Франция, Германия ва Буюк Британия сиёсатчилари орасида Украина 2014 йилдан бери босиб олинган барча ҳудудларини озод қила олишига шубҳа кучаймоқда.
“Биз Россия ғалаба қозонмаслиги кераклигини такрорлаймиз, аммо бу нимани англатади? Агар уруш шу зайлда узоқ давом этса, Украинанинг йўқотишлари қайтариб бўлмас даражага етади. Ҳеч ким Украина Қримни қайта олишига ишонмаяпти”, — деди юқори мартабали француз расмийси.
Франция президенти Эммануэл Макрон ва Германия канцлери Олаф Шольц Украина етакчиси Владимир Зеленскийни февраль ойидаги учрашувда Москва билан тинчлик музокараларини кўриб чиқишга чақирган, дейди The Wall Street Journal манбалари.
Елисей саройида кечки овқат пайтида Макрон Зеленскийга Франция ва Германия каби “бир-бирини кўрарга кўзи йўқ душманлар” ҳам Иккинчи жаҳон урушидан кейин тинчлик ўрнатишга мажбур бўлганини айтган, деди манбалар.
Россия ҳукумати Украина ҳукумати билан тинчлик музокараларини ўтказишга тайёрлигини бир неча бор таъкидлаган, аммо фақат ўз шартлари билан. Хусусан, Россия босқинининг бир йиллиги муносабати билан Россия ТИВ ана шундай шартлар қаторига Ғарбнинг Украинага қурол-яроғ етказиб беришни тўхтатиши, шунингдек, Киевнинг Россия томонидан аннексия қилинган ҳудудларни қайтаришни талаб қилмаслигини тилга олди.
Украина ўзининг “тинчлик формуласи”ни талаб қилмоқда. Украина етакчиси Владимир Зеленский Россия президенти Владимир Путин билан музокарага тайёр эмаслигини бир неча бор айтган.
Изоҳ (0)