Чечен республикаси Қаҳрамони унвони биринчи бўлиб республика раҳбари Рамзан Қодировга берилди. Бу ҳақда Чеченистон парламенти раиси Магомед Даудов маълум қилди ва мазкур унвон республикадаги энг юқори унвон эканини таъкидлади.
Унвонни топшириш шартларига мувофиқ, у “қаҳрамонлик кўрсатиш билан боғлиқ” ҳолда Чеченистон олдидаги “ажойиб хизматлари учун” берилади. Чеченистон Қаҳрамони унвонини бериш тўғрисида қарор ҳудуд раҳбари томонидан қабул қилинади.
Даудовнинг табрикномасида айтилишича, Қодиров республика раҳбари вазифасини бажарувчи Муслим Хучиевнинг 2022 йил 26 декабрдаги фармонига мувофиқ ушбу унвон билан тақдирланган.
“Қодиров халқаро терроризм ва экстремизмга қарши курашда кўрсатган фидойилиги ва жасорати, ватанга хизмат қилишнинг ёрқин намунаси бўлган дадил ва қатъий ҳаракатлари, тинчлик ва давлат яхлитлигини сақлашга, миллий хавфсизликни таъминлашга ва ватан манфаатларини ҳимоя қилишга ҳисса қўшадиган фаолият учун алоҳида эътироф этилди”, — деб таъкидлаган Даудов.
“Менинг камтарона хизматларимга берилган юксак баҳо учун жамиятимиздан чин дилдан миннатдорман”, — дея жавоб қайтарган Чеченистон раҳбари.
Қодиров Чеченистон республикаси Қаҳрамони унвонини 2022 йилнинг кузида таъсис этган. Чеченистон раҳбари таъкидлаганидек, унвонни қўлга киритганларга бериладиган медал саккиз қиррали юлдуз кўринишидаги 70 грамм 750 пробали олтиндан ясалган. Медалнинг пастки қисми “Аллоҳу Акбар. Ахмат-Сила” шўзлари билан безатилган.
Изоҳ (0)