НАТО бош котиби Йенс Столтенберг Хитойнинг Украинадаги урушни тугатиш режасига муносабат билдириб, бу борада Пекинга ишонч йўқлигини айтди. Бу ҳақда Reuters хабар берди.
Столтенберг 24 февраль куни Эстонияга ташрифи чоғида Хитойнинг “тинчлик режаси” бўйича фикр билдирган.
“Хитойга нисбатан ишонч йўқ, чунки у Украинага ноқонуний босқинни қораламади, шунингдек, босқиндан бир неча кун олдин Хитой раиси Си Цзиньпин Россия билан чегарасиз ҳамкорлик тўғрисидаги битимни имзолади”, — дейди НАТО бош котиби.
Шу билан бирга, Столтенберг Хитойни Россияга қурол етказиб беришдан огоҳлантирди. Сиёсатчи бу Россиянинг ноқонуний босқинчилик урушини қўллаб-қувватлаш билан баробар эканини билдирди.
“Биз Хитой нима қилаётганини диққат билан кузатиб боряпмиз ва улар Россияга ўлимга олиб келувчи ёрдам юбориш ҳақида ўйлаётгани аломатларини кўрдик. Бу жуда катта хато бўларди”, — дея хулоса қилди НАТО бош котиби.
Хитойнинг тинчлик режаси
24 февраль куни “Хитойнинг Украина инқирозини сиёсий йўл билан ҳал қилиш бўйича позицияси” ҳужжати эълон қилинди, у 12 бандни ўз ичига олади. Хусусан, Пекин ҳудудий яхлитликни ҳурмат қилиш ҳақида гапиради, музокаралар олиб боришга чақиради, “бир томонлама санкциялар”га ва ядро қуролидан фойдаланишга қаршилик билдиради. Шу билан бирга, Хитой ўз позициясида Россиянинг Украинага бостириб киришини ва агрессив мамлакатнинг ҳарбий жиноятларини қораламайди.
Изоҳ (0)