“Учинчи жаҳон уруши бўлиши хавфи бор”: Зеленский Хитой Россияга қуроллар етказиб бериши мумкинлиги ҳақида гапирди

Украина президенти Владимир Зеленский Хитой Россияга қурол етказиб бермаслигига умид қилишини айтди ва Хитой раиси Си Цзиньпин билан учрашмоқчилигини маълум қилди. Бу ҳақда унинг Киевдаги матбуот анжуманидаги нутқига таяниб, “Интерфакс” хабар берди.

“Мен Хитой адолатли дунё тарафида бўлишига ишонмоқчиман, бу Украина томонда бўлишни англатади. Сизга ростини айтаман, Хитой Россияга қурол етказиб бермаслигига чиндан ҳам ишонишни хоҳлайман. Бу мен учун жуда муҳим”, — деди у.

Украина президенти Россияга Хитой қуроллари етказиб берилишининг олдини олиш учун барча имкониятларни ишга солаётганини қайд этди. “Тўғрисини айтсам, бу учинчи жаҳон уруши бўлишига олиб келиши мумкин”, — деди Украина раҳбари.

Шунингдек, у Хитой раиси Си Цзиньпин билан учрашишни режалаштираётганини қўшимча қилди.

“Аввало, мен Си Цзиньпин билан учрашишни режалаштирмоқдаман. Бу давлатларимиз манфаати ва жаҳон хавфсизлигига хизмат қилишига ишонаман. Хитой билан савдо айланмамиз катта. Бу фақат уруш ҳақида эмас. Гап шундаки, биз иқтисодий муносабатларни сақлаб қолишдан манфаатдор давлатлармиз. Билишимча, Хитой ҳудудий яхлитликни ҳурмат қилади, демак, Россия ҳудудимиздан чиқиб кетиши учун ҳамма нарсани қилиши керак. Чунки бу суверенитет ва ҳудудий яхлитликка ҳурмат қилишни билдиради”, — деди Зеленский.

Аввалроқ Der Spiegel нашри россиялик ҳарбийлар хитойлик дрон ишлаб чиқарувчилар билан камикадзе дронларни етказиб бериш бўйича музокаралар олиб бораётгани ҳақида хабар берганди. Февраль ойи бошида АҚШ ҳукумати вакиллари ҳам Хитой Россияга қурол етказиб беришни бошлаши мумкинлиги ҳақида гапирган.

Россиянинг Украинага кенг кўламли бостириб киришининг бир йиллиги муносабати билан Хитой Ташқи ишлар вазирлиги 12 банддан иборат Украина инқирозини сиёсий йўл билан ҳал қилиш бўйича ўз позициясини тақдим этди. Улар орасида бир томонлама санкцияларни ва Совуқ урушни рад этиш ўрин олган. Украина президенти Владимир Зеленский “бу Хитойнинг тинчлик режаси” эмаслиги, балки Пекиннинг “фикрлари” эканини айтди, аммо Хитой Украина ҳақида гапира бошлаганини “жуда яхши” деб баҳолади.