Fransiya, Germaniya va Buyuk Britaniya Kiyevni Moskva bilan tinchlik muzokaralarini boshlashga undash uchun Ukraina va NATO o‘rtasida yaqinroq aloqa o‘rnatish masalasini ko‘rib chiqmoqda. Bu haqda The Wall Street Journal nashriga uch mamlakat hukumatlari vakillari anonim tarzda ma’lum qilishdi.
O‘tgan hafta Britaniya bosh vaziri Rishi Sunak Ukrainaga urush tugaganidan keyin mudofaa uchun ilg‘or harbiy texnika, qurol va o‘q-dorilardan kengroq foydalanish imkonini beruvchi kelishuv loyihasini taklif qilgandi. Uning so‘zlariga ko‘ra, bu reja iyul oyida NATO sammitida muhokama qilinadi.
Fransiya, Germaniya va Britaniya rasmiylarining aytishicha, Fransiya va Germaniya bu tashabbusni qo‘llab-quvvatlagan. Ular buni Ukrainada ishonchni mustahkamlash va mamlakat rasmiylarini tinchlik muzokaralari sari undash deb bilmoqda.
“Taklif etilayotgan kelishuvning yana bir maqsadi Rossiyaga ta’sir o‘tkazishdir”, — dedi Britaniya manbasi gazetaga. “Agar Rossiya kelajakda G‘arb Ukrainaga harbiy yordamni kengaytirishga tayyorligini ko‘rsa, bu Moskvani harbiy maqsadlariga erisha olmasligiga ishontiradi”, — deya tushuntirdi u.
Shu bilan birga, The Wall Street Journal manbalari bu muzokaralar qachon va qanday sharoitda boshlanishi haqidagi har qanday qarorni Kiyev qabul qilishi kerakligini aytdi.
Gazetaning suhbatdoshlariga ko‘ra, Fransiya, Germaniya va Buyuk Britaniya siyosatchilari orasida Ukraina 2014-yildan beri bosib olingan barcha hududlarini ozod qila olishiga shubha kuchaymoqda.
“Biz Rossiya g‘alaba qozonmasligi kerakligini takrorlaymiz, ammo bu nimani anglatadi? Agar urush shu zaylda uzoq davom etsa, Ukrainaning yo‘qotishlari qaytarib bo‘lmas darajaga yetadi. Hech kim Ukraina Qrimni qayta olishiga ishonmayapti”, — dedi yuqori martabali fransuz rasmiysi.
Fransiya prezidenti Emmanuel Makron va Germaniya kansleri Olaf Shols Ukraina yetakchisi Vladimir Zelenskiyni fevral oyidagi uchrashuvda Moskva bilan tinchlik muzokaralarini ko‘rib chiqishga chaqirgan, deydi The Wall Street Journal manbalari.
Yelisey saroyida kechki ovqat paytida Makron Zelenskiyga Fransiya va Germaniya kabi “bir-birini ko‘rarga ko‘zi yo‘q dushmanlar” ham Ikkinchi jahon urushidan keyin tinchlik o‘rnatishga majbur bo‘lganini aytgan, dedi manbalar.
Rossiya hukumati Ukraina hukumati bilan tinchlik muzokaralarini o‘tkazishga tayyorligini bir necha bor ta’kidlagan, ammo faqat o‘z shartlari bilan. Xususan, Rossiya bosqinining bir yilligi munosabati bilan Rossiya TIV ana shunday shartlar qatoriga G‘arbning Ukrainaga qurol-yarog‘ yetkazib berishni to‘xtatishi, shuningdek, Kiyevning Rossiya tomonidan anneksiya qilingan hududlarni qaytarishni talab qilmasligini tilga oldi.
Ukraina o‘zining “tinchlik formulasi”ni talab qilmoqda. Ukraina yetakchisi Vladimir Zelenskiy Rossiya prezidenti Vladimir Putin bilan muzokaraga tayyor emasligini bir necha bor aytgan.
Izoh (0)