Қашқадарёда акасининг паспорти билан чет элга чиқиб кетмоқчи бўлган алимент тўловчи фуқарога нисбатан жиноят иши қўзғатилди. Бу ҳақда Транспорт ва туризм объектларида хавфсизликни таъминлаш департаменти хабар қилди.
Маълум қилинишича, 1985 йил Қашқадарё вилоятида туғилган Ҳ.Б. алимент тўловчи бўлгани боис Ўзбекистондан чет элга чиқа олмаслигини била туриб, 24 январь куни акаси Ҳ.Ш.нинг хонадонига бориб, унинг номига расмийлаштирилган хорижга чиқиш биометрик паспортини ўзига билдирмасдан яширинча уйдан олиб чиққан.
Ҳ.Б. ўзининг жиноий ҳаракатларини давом эттириб, ўзида хорижга чиқиш биометрик паспорти мавжуд бўлмаган бўлса-да, у қонунга хилоф равишда эгаллаган ва яшириб келган акасининг хорижга чиқиш биометрик паспортидан фойдаланиб, 25 январь куни Бухоро халқаро аэропортидан Бухоро—Москва йўналиши бўйича учиб кетадиган авиарейсга чипта сотиб олган.
Ушбу рейс билан Россияга учиб кетиш мақсадида шу куни Бухоро халқаро аэропортига келиб, соат 23:30 ларда авиарейсга чиқишдан олдин чегара назоратидан ўтаётганида, у бировнинг паспорти билан чет элга чиқиб кетмоқчи бўлгани Бухоро халқаро аэропортида хизматда бўлган чегара назорати ходимлари ва Бухоро вилоят ИИБ ТХТБ ходимлари томонидан аниқланиб, паспорт далилий ашё сифатида олиб қўйилган.
Мазкур ҳолат юзасидан 2023 йил 1 февраль куни Бухоро вилоят ТХТБ ТГ катта терговчиси майор О.Т.Муродов томонидан Ҳ.Б.га нисбатан Жиноят кодексининг 227-моддаси 2-қисми “а” банди (паспорт ёки идентификацияловчи ID-картани эгаллаш, нобуд қилиш, уларга шикаст етказиш ёки уларни яшириш), 25,223-моддаси 1-қисми (қонунга хилоф равишда чет элга чиқиш) билан жиноят иши қўзғатилиб, тергов ҳаракатлари олиб борилиб, жиноят иши айблов хулосаси билан ЖИБ Когон шаҳар судига юборилган.
Изоҳ (0)