АҚШ давлат котиби Энтони Блинкен 28 февралдан 3 мартгача Ўзбекистон, Қозоғистон ва Ҳиндистонга ташриф буюради. Бу ҳақда АҚШ Давлат департаменти матбуот хизмати хабар берди.
Қайд этилишича, у ўз сафарини Остонадан бошлаб, минтақадаги бешта давлат вакиллари иштирок этадиган “C5+1” форматидаги (Марказий Осиёв + АҚШ) учрашувда иштирок этади ва “АҚШнинг Марказий Осиё давлатлари мустақиллиги, суверенитети ва ҳудудий яхлитлигига содиқлигини, шунингдек, умумий глобал муаммоларга ечим топишда минтақа билан ҳамкорлик қилишни тасдиқлайди”.
“C5+1” форматидаги вазирлар йиғилишида АҚШ, Қозоғистон, Қирғизистон, Тожикистон, Туркманистон ва Ўзбекистон ўртасидаги иқтисодий, энергетика, атроф-муҳит ва хавфсизлик соҳасидаги ҳамкорликни мустаҳкамлаш масалалари муҳокама қилинади.
Шундан кейин Блинкен Тошкентга келиб, мамлакат расмийлари билан “икки томонлама ва минтақавий масалалар бўйича ҳамкорлигимизни янада ривожлантириш” борасида музокаралар ўтказади. Бу АҚШ давлат котибининг Ўзбекистонга биринчи ташрифи ҳисобланади.
1 март куни эса у Нью-Делига бориб, G20 га аъзо давлатларнинг ташқи ишлар вазирларини озиқ-овқат ва энергетика хавфсизлиги, барқарор ривожланиш, гиёҳвандликка қарши кураш, глобал соғлиқни сақлаш, гуманитар ёрдам ва табиий офатлар оқибатларини бартараф этиш, гендер тенглиги ва аёллар ҳуқуқларини кенгайтириш соҳаларида ҳамкорликни мустаҳкамлаш масалаларига бағишланган йиғилишда қатнашади.
Аввалроқ Энтони Блинкен Ўзбекистонда амалга оширилаётган ислоҳотларни ижобий баҳолаб, Америка томони уларни амалга ошириш жараёнида ҳар томонлама ёрдам беришга тайёрлигини билдирганди. АҚШ давлат департаменти раҳбари республиканинг инсон ҳуқуқларини ҳимоя қилиш, шу жумладан, диний эркинликларни таъминлаш, одам савдосига қарши курашиш ва мажбурий меҳнатга барҳам бериш борасида эришган ютуқларини алоҳида таъкидлаган.
Изоҳ (0)