Шавкат Мирзиёев Қашқадарёга ташрифини Қарши туманидан бошлагани ҳақида хабар берилган эди. Давлат раҳбари “Янги Батош” маҳалласида бўлиб, аҳоли ҳаёти билан яқиндан танишди.
Президент матбуот хизматининг маълум қилишича, давлат раҳбари маҳалладаги Касаначилик марказига бориб, унда яратилаётган шароитларни кўздан кечирди. Давлат раҳбари бу ердаги ҳунармандларни хом ашё билан таъминлаш, аҳоли зич маҳаллалардаги коллежларнинг маълум хоналарини касаначиларга ажратиш бўйича топшириқлар берди.
“Ўзи ҳунар ўрганишнинг энг катта замини — маҳалла. Бу анъанамиздан фойдаланиб, касаначилик асосида, устоз-шогирдлик асосида ёшларни ҳунарли қилиш мумкин. Бу уларга, айниқса, хотин-қизларга ҳам маънавий, ҳам моддий куч бўлади, — деди Шавкат Мирзиёев.
Қайд этилишича, марказ “Янги Батош”дан ташқари унга туташ “Батош”, “Хониён”, “Тараққиёт”, “Дашт”, “Жумабозор” каби маҳаллаларга ҳам хизмат қилади. У тўлиқ ишга тушса, қарийб 24 минг нафар аҳоли бандлигида муҳим омил бўлади.
Изоҳ (0)