Латвия Россия устидан махсус трибуналда Украинанинг адвокати бўлишга тайёр. Бу ҳақда Украина Олий Радаси раиси ўринбосари Элена Кондратюк маълум қилди.
Кондратюкнинг сўзларига кўра, у ушбу масалани Латвия адлия вазири Инесса Либина-Эгнер билан учрашувда муҳокама қилган. “Адлия вазири Латвия бу масалада Украинанинг адвокати бўлишига ишонтирди”, — деб ёзади Кондратюк Facebook саҳифасида.
Бундан ташқари, йиғилишда “музлатилган Россия активларини Украинани тиклаш мақсадларида мусодара қилиш”ни ҳуқуқий қўллаб-қувватлаш масаласи кўтарилди, дея қўшимча қилган Олий Рада раиси ўринбосари.
Ноябрь ойи охирида Еврокомиссия раҳбари Урсула фон дер Ляен БМТ кўмагида Россиянинг Украинадаги ҳаракатларини тергов қилиш ва жиноий жавобгарликка тортиш учун ихтисослаштирилган суд яратиш зарурлигини маълум қилганди. Унинг айтишича, Россия Украинага етказилган молиявий зарарни ҳам қоплаши керак, унинг ўша пайтдаги ҳисоб-китобларига кўра, бу 600 миллиард евродан ошган.
Ўша куни Франция Ташқи ишлар вазирлиги Брюссел ва Киев билан биргаликда Россиянинг Украинага қарши босқинчилик жинояти бўйича Maxсус трибунал яратиш устида иш бошланганини эълон қилди.
Айни вақтда Европа Иттифоқининг аноним расмийлари The Washington Post билан суҳбатда махсус трибунал яратиш таклифини БМТ Хавфсизлик Кенгашидан ўтказиб бўлмаслиги (Россия у ерда вето ҳуқуқига эга), аммо бу БМТ Бош Ассамблеяси орқали амалга оширилиши мумкинлиги ҳақида фикр билдирган.
Изоҳ (0)