Владимир Путин Россияда 2024 йилда бўлиб ўтадиган президентлик сайловларида қатнашиш-қатнашмаслиги ҳақида ҳозирча гапирмаган. Бу ҳақда Кремл матбуот котиби Дмитрий Песков “ТАСС” агентлигига берган интервьюсида маълум қилди.
“Бу борада баёнот эшитдингизми? Мен ҳам эшитмадим”, — деди Россия президенти матбуот котиби журналистнинг тегишли саволига жавобан. Песков президент бу борадаги қарорини қачон эълон қилиши ҳақида бир нарса деёлмаслигини айтди.
21 февраль куни Путин Федерал Мажлисга мурожаат йўллар экан, 2024 йилда бўлиб ўтадиган президентлик сайловлари қатъий қонунларга мувофиқ, шунингдек, барча демократик ва конституциявий тартибларга риоя қилинган ҳолда ўтказилишини айтди. Бу 2023 йил сентябрида маҳаллий ва минтақавий ҳокимият органлари учун бўладиган сайловларга ҳам тегишли, деди Россия раҳбари.
Қонун бўйича Путин 2024 йилда янги президентлик муддати учун номзодини қўйиш ҳуқуқига эга. Январь ойи бошида “Коммерсант” манбалари Кремлнинг ички сиёсий блоки 2024 йилги президентлик сайловларига улар белгиланган муддатда ва амалдаги президент иштирокида ўтказилишидан келиб чиқиб тайёргарлик кўришни бошлагани ҳақида хабар берганди. Meduza 2022 йил октябрь ойида Кремл президентлик кампаниясига тайёргарликни бошлаганини ёзган.
Президент сайловидан аввалги сўнгги ҳудудий сайловлар 2023 йил сентябрига белгиланган, “Коммерсант” манбаси айтишича, у анча кўп сонли ҳудудларни ўз ичига олади. Демак, ҳудудий сайловларда ҳам технологик, ҳам мазмуний ғояларни синаб кўриб, сўнг уларни 2024 йилда ҳам қўллаш мумкин бўлади. Бу йил камида 20 та ҳудудда губернаторларнинг тўғридан тўғри сайловлари, 16 тасида эса қонунчилик мажлисларига сайловлар бўлиб ўтиши керак.
Изоҳ (0)