Эквадорда Бирлашган Миллатлар Ташкилотининг Наркотиклар ва жиноятчилик бўйича бошқармаси (UNODC) кўмагида кокаин маҳсулотларини қурилиш материалларига айлантириш бошланди. Бу ҳақда Reuters хабар бермоқда.
Бунинг учун хавфли чиқиндилар гермитик ва нореактив материаллардан тайёрланган идишларга утилизация қилинаётган пайтда инкапсуляция усули қўлланади.
Мусодара қилинган кокаин блоклари бошқа чиқиндилар (жумладан, шиша, яроқлилик муддати ўтган дори воситалари ва ҳатто нефть чиқиндилари) билан бирга чиқиндини қайта ишлаш заводида майдаланади, сўнгра кукун цемент, қум ва сув билан аралаштириб бетон ҳосил қилинади. Ундан завод омбори учун пойдевор қўйилади — айнан қайси омборлар учун ишлатилишини расмийлар хавфсизлик нуқтаи назаридан ошкор қилмаяпти. Айни пайтда қурилиш учун 2021 йилдан 2022 йилгача мусодара қилинган 350 тоннага яқин майдаланган кокаин ва прекурсорлардан фойдаланилган.
“Бир тонна кокаинни ёқиш учун 12 соатгача вақт кетиши мумкин, шунча миқдордаги кокаинни инкапсуляция қилиш эса уч соатдан камроқ вақт олади”, — деди наркотиклар бўлими раҳбари Пабло Рамирес. “Жараён арзонроқ, камроқ вақт талаб этади ва атроф-муҳитга таъсир қилмайди”.
Эквадор президенти Гилермо Лассо мамлакат орқали кокаинни АҚШ ва Европага ўтказаётган наркотўдаларга қарши курашни кучайтирган. Полиция маълумотларига кўра, 2021 йилда мамлакатда мусодара қилинган гиёҳванд моддалар миқдори аввалги йилга нисбатан қарийб икки баравар ошган (210 тоннадан кўп) ва уларнинг аксарияти — кокаин. Одатда гиёҳванд моддаларни ёқадиган печлар ҳозир бунча миқдорга дош беролмайди, деди Эквадор ички ишлар вазири ўринбосари Эдмундо Мера.
2022 йилнинг декабрь ойида Bloomberg “кокаиннинг олтин даври” келаётгани ҳақида ёзганди. Бунга Колумбияда гиёҳванд моддалар ишлаб чиқариш рекорд даражага етгани, шунингдек, наркокартеллар гиёҳванд моддаларни яшириш ва уларни бутун дунё бўйлаб кўп миқдорда ташишда моҳирлашаётгани сабаб бўлмоқда.
Изоҳ (0)