АҚШ расмийларининг маълум қилишича, Россия АҚШ президенти Жо Байден Киевга ташриф буюрган куни “Сармат” қитъалараро баллистик ракетасини синовдан ўтказган, парвоз муваффақиятсиз тугаган. Бу ҳақда CNN телеканали америкалик икки нафар аноним мулозимга таяниб хабар берди.
Расмийлардан бирининг таъкидлашича, Россия ихтилофли вазиятларнинг олдини олиш мақсадида АҚШни ракета синовлари ҳақида олдиндан хабардор қилган. Парвоз вақтида Россия ракетасининг иккинчи босқичи ишдан чиққан ва у ҳавода портлаб кетган.
Синов Америка учун хавф туғдирмади ва унга “аномалия ёки кескинликнинг кучайиши” сифатида қаралмади, дея қўшимча қилди бошқа манба. Суҳбатдошлардан бирининг айтишича, Россия синовларни Жо Байден Украинага келишидан олдин ўтказган. Бошқа бир амалдор эса воқеа 20 февраль куни содир бўлганини таъкидлаб, аниқ вақтини айтмади.
CNN таъкидлашича, ҳафта бошида Қўшма Штатлар ва Россия зиддиятли вазиятларнинг олдини олиш мақсадида турли каналлар орқали мулоқот қилган. Хусусан, АҚШ Байденнинг Киевга ташрифи ҳақида бир неча соат олдин Россияни хабардор қилган, деганди аввалроқ АҚШ миллий хавфсизлик маслаҳатчиси Жейк Салливан. “Ҳеч қандай фикр алмашиш бўлмади. Фақат билдиришнома юборилиб, унинг қабул қилингани ҳақида тасдиқ олинди. Ҳеч қандай кафолатлар йўқ ”, — деган Салливан.
Россия ҳукумати CNN нашрига ҳозирча изоҳ бермади.
2022 йилнинг 20 апрелида Украинага босқин фонида Россия Мудофаа вазирлиги давлат синови дастури доирасида “Сармат” ракетасининг биринчи синови амалга оширганини маълум қилганди. Ўша амалиётдан сўнг синовларни видеоалоқа орқали кузатган Владимир Путин “Сармат” ракетаси Россияга таҳдид солмоқчи бўлганларни “ўйлантиришини” айтган. Ўшанда ҳам АҚШ расмийлари “Сармат”нинг учирилишини мамлакат учун таҳдид деб ҳисобламаганди.
Россия президенти Владимир Путин 2023 йил 21 февралда Москва АҚШ ва Россия ўртасидаги ядро каллаклари ва баллистик ракеталар сонини тартибга солувчи Стратегик ҳужум қуроллари тўғрисидаги шартномадан чиқишини эълон қилди. Россия Ташқи ишлар вазирлиги ушбу қарор “қайтариб олиниши мумкин”лигини билдирди ва келишувда назарда тутилган чекловларга риоя қилишга ваъда берди.
Изоҳ (0)